Posted: 03/24/2012 12:26 PM IST

           అంతర్జాతీయ మార్కెట్‌లో పెట్రోలియం ఉత్పత్తుల ధరలు పెరుగుతున్న నేపథ్యంలో ప్రభుత్వం మరోసారి పెట్రోల్, వంటగ్యాస్ ధరలను పెంచే సన్నాహాల్లో ఉంది. పెట్రోలియం ఉత్పత్తుల విక్రయంపై భారీ నష్టాలను చవిచూస్తున్న చము రు మార్కెటింగ్ కంపెనీలు ధరల పెంపు కోసం ప్రభుత్వాన్ని గట్టిగా డిమాండ్ చేస్తున్నాయి. అంతర్జాతీయ మార్కెట్‌లోని రేట్ల దృష్ట్యా పెట్రోలియం ఉత్పత్తు ల ధరలను సమీక్షించాలన్నదే ప్రభుత్వ అభిప్రాయమని చమురు మంత్రి జైపాల్‌రెడ్డి కూడా ఆసియా గ్యాస్ భాగస్వామ్య సమ్మిట్ సం దర్భంగా స్పష్టం చేశారు కూడా. 
           ఇండియన్ ఆయిల్, భారత్ పెట్రోలియం, హిందుస్తాన్ పెట్రోలియం గత కొంతకాలంగా ప్రభుత్వాన్ని రేట్ల పెంపుకోసం ఒత్తిడి చేస్తున్నాయి. కేవలం పెట్రోల్ పైనే ఈ కంపెనీలు 4500 కోట్ల రూపాయల మేర నష్టాలను చవిచూశాయి. కాగా, గత డిసెంబర్‌లో ఆఖరుసారిగా పెట్రోల్ ధరలను సవరించారు.         

           మార్చి నెలాఖరుతో ఆర్థిక సంవత్సరం ముగుస్తున్న నేపథ్యంలో ఈ లోపే ప్రభుత్వం రేట్ల పెంపుపై నిర్ణయం తీసుకునే అవకాశం ఉందని భావిస్తున్నారు. పూర్తిగా అంతర్జాతీయ మార్కెట్‌కు అనుగుణంగా రేట్లను సవరించాల్సి వస్తే 20 శాతం సేల్స్ టాక్స్‌ను కూడా కలుపుకుని లీటర్‌కు కనీసం 7.72 రూపాయల మేర రేటు పెంచాల్సి ఉంటుందని ఐఒసి చైర్మన్ ఆర్ ఎస్ బుటోలా అంటున్నారు. ఈ మాటలే నిజమైతే వాహన దారులకు మరో మహత్తర వాయింపు తప్పదన్నమాటే.

...avnk