Posted: 12/24/2011 01:03 PM IST

రోడ్లు సరిగ్గా లేకపోతే పన్నులు కడుతున్నా సౌకర్యాలెందుకు మెరుగుపడటం లేదని ప్రభుత్వాన్ని నిలదీయకుండా, వాహనాలను నడిపేవారు, బాటసారులు తగువులాడుకుంటారు.  రాకరాక బస్సు వస్తే కుమ్ముకుంటూ అందులో ఎక్కినవారు ఒకరినొకరు తప్పులెన్నుతూ దెబ్బలాడుకుంటారు కానీ, అంత సేపు బస్సు సర్వీసు ఎందుకు లేదు, రద్దీ ఉన్న చోట ఎక్కువ బస్సులను ఎందుకు వెయ్యరు అని రవాణా యాజమాన్యాన్ని ప్రశ్నంచరు.  

తెలంగాణా మేమే ఇస్తామన్న కాంగ్రెస్ దాటవేస్తుంటే నిజంగా ఉద్యమం చెయ్యదలచుకుంటే కలిసి పోరాడవలసిన పార్టీలు ఆ పని చెయ్యకుండా పరస్పరం విమర్శనాస్త్రాలను సంధించుకుంటూ పోరాటాలు సలుపుతున్నారు, కాలం గడుపుతున్నారు.  తీరా తెలంగాణా వస్తే వెనకబడిపోతామేమోనన్న తపన కూడా రాజకీయాల్లో ఉంటుందనుకోండి. 

ఉద్యమంలో 42 రోజులు సకల జనుల సమ్మె జరిగి జనమంతా బయటకు వస్తే, కెసిఆర్ మాత్రం చల్లగా ఫామ్ హౌస్ లో పవ్వళించారని మోత్కుపల్లి ఆరోపిస్తూ, తెలంగాణా కోసం తను ప్రాణాలర్పించటానికి సిద్ధమేనని, కెసిఆర్ కూడా అందుకు సిద్ధమైతే రమ్మని సవాలు చేస్తూ గన్ పార్క్ కి చేరుకున్న తెదేపా నేత మోత్కుపల్లి కి సమాధానంగా, ఎవరి వలన తెలంగాణా రావటం లేదో ప్రజా కోర్టులో తేల్చుకుందామని, తెదేపా సభ్యులు దమ్ముంటే రాజీనామాలు చేసి రావాలని అంటూ 700 మంది విద్యార్థులు మరణించటానికి కారణం చంద్రబాబేనని తెరాస నేత హరీష్ రావు అన్నారు. 

-శ్రీజ