Posted: 12/05/2011 11:45 AM IST

ఈరోజు అవిశ్వాస తీర్మానంలో తనకి కేటాయించిన సమయంలో మాట్లాడిన తెదేపా అధ్యక్షుడు చంద్రబాబు నాయుడు, రైతు వెతలను, వస్త్రాలమీద 5 శాతం వ్యాట్ ను, చిల్లర వ్యాపారంలో ప్రభుత్వం అనుమతించిన విదేశీ పెట్టుబడులను విమర్శించారు. మన రాష్ట్రం అభివృద్ధిలో 12 వ స్థానంలో ఉన్నా, ఆకలి చావుల్లోనూ, అవనీతిలోనూ ప్రథమ స్థానాన్ని అలంకరించిందని చంద్రబాబు వ్యాఖ్యానించగా, ముందు మీ మీద అవినీతి ఆరోపణలకు జవాబు చెప్పండని ముఖ్యమంత్రి కిరణ్ కుమార్ విమర్శించారు. రాష్ట్రంలోని మంత్రులు అవినీతికి పాల్పడుతూ జలగల్లా ప్రజల ధనాన్ని దోచుకుంటున్నారని చంద్రబాబు అనగా, ప్రతిస్పందనగా, తమరు నీతిపరుడని ముందు కోర్టులో నిరూపించుకోమని ముఖ్యమంత్రి కిరణ్ కుమార్ అన్నారు. ఒకరు అవినీతిని ఎండగడితే, మీరూ అంతేనని అనటం బాధ్యతా రాహిత్యం అవుతుందని తెలిసినా, ఎదుటివారిని నోరెత్తకుండా చెయ్యటంలో ఆయుధంగా ఉపయోగించటం కోసం అలా మాట్లాడాల్సివస్తుంది. మీరు అవినీతి పరులు అని అంటే, మరి మీరు మాత్రం అని ఎదురు చెప్పటంలో తమ మీది అభియోగాన్ని ఒకవిధంగా ఒప్పుకోవటమే అవుతుంది. చాలా మంది నాయకులు, ఫలానావారికి చిత్తశుద్ధి లేదు, వారికి ఆ మాటలనే నైతిక హక్కు లేదు అని అంటుంటారు. కానీ ఒకరి తప్పు మరొకరి తప్పుకి చెల్లు అవుతుందా, ఒకరు చేసిన తప్పు మరొకరి తప్పుకి బలమిస్తుందా.

ఈ సంఘర్షణ మధ్యలో తెలుగుదేశం తెలంగాణా ఫోరం సభ్యులు సభాపతి దగ్గరికి వెళ్ళి ఆందోళన ప్రారంభించగా, సభను 15 నిమిషాలు వాయిదా వేసారు.

శ్రీజ