గ్రీన్ టీ తాగండి.. మెదడును చురుగ్గా వుంచుకోండి..

Posted: 11/05/2015 01:06 PM IST

ప్రస్తుత ఫాస్ట్ జనరేషన్ లో నిరంతర పని ఒత్తిడి కారణంగా ప్రతిఒక్కరూ నీరసించిపోతారు. ఉదయం చురుగ్గా వున్నప్పుటికీ.. సాయంత్రినికల్లా పూర్తిగా డీలా పడిపోతుంటారు. అలాంటి సమయాల్లో మెదడు చురుగ్గా పనిచేయదు. కేవలం ఇటువంటివారే కాదు.. మరికొందరు తమకు జ్ఞాపకశక్తి లోపించిందంటూ బాధపడుతుంటారు. విద్యర్థుల నుంచి మధ్యవయస్కులవారిదాకా ఈ తరహా సమస్యతో ఇబ్బంది పడుతుంటారు. ఇలాంటివారికోసం నిపుణులు ఓ మెరుగైన సలహా ఇస్తున్నారు. ప్రతిరోజూ గ్రీన్ టీ తాగడం వల్ల మెదడు చురుగ్గా పనిచేస్తుందని ఓ అధ్యయనంలో వెల్లడైంది.

గ్రీన్ టీ తాటినప్పుడు మెదడులోని నాడీకణాల మధ్య సమన్వయం పెరుగుతుందని, తద్వారా మెదడు చురుగ్గా ఉండడం సాధ్యమవుతుందని తేలింది. దీనివల్ల జ్ఞాపకశక్తి వృద్ధి చెందుతుందని శాస్త్రవేత్తలు తెలిపారు. బాసెల్ విశ్వవిద్యాలయం పరిశోధకులు జరిపిన పరిశోధనలో ఈ విషయం వెల్లడైంది. గ్రీన్ టీ తాగిన వెంటనే ఫలితం కనిపిస్తుందని, అలసట దూరం అవుతుందని.. తద్వారా ఉత్సాహం పెరుగుతుందని పరిశోధకులు అంటున్నారు. ఈ అధ్యయనంలో భాగంగా, ఆరోగ్యంగా ఉన్న కొంతమందికి గ్రీన్ టీ ఇచ్చి, ఈ తర్వాత కొన్ని పజిళ్లను పరిష్కరించమని చెప్పారు. వారు ఆ పజిళ్లను పరిష్కరిస్తున్న సమయంలో.. వారి మెదడులో జరిగిన మార్పులను ఎమ్ఆర్ఐ ద్వారా పరిశీలించారు. మెదడులోని ఫ్రంటల్, పెరిటల్ ప్రాంతాల్లో నాడీకణాల (న్యూరాన్ల) మధ్య సమన్వయం పెరిగిందని ఈ పరిశీలనలో తేలింది. ఈ అధ్యయనంలో వెల్లడైన వివరాల ప్రకారం.. గ్రీన్ టీ తాగితే మెదడు చురుగ్గా పనిచేస్తుందని తేలింది.

అయితే.. గ్రీన్ టీని పరిమితిగా తాగితే మంచిదని సూచిస్తుంటారు. గ్రీన్ టీలో వుండే సహజ ఔషధాలు ఆరోగ్యాన్ని మెరుగుపచడంతోపాటు మెదడును చురుగ్గా వుండేలా చేస్తుందని ఎక్కువ మోతాదులో తీసుకుంటే.. తీవ్ర పరిణామాలు ఎదుర్కోవాల్సి వస్తుందని నిపుణులు చెబుతున్నారు. అందుకే.. రోజుకు కేవలం రెండుసార్లు తీసుకుంటే శ్రేయస్కరమని అంటున్నారు.