అందానికి, ఆరోగ్యానికి నెయ్యి దివ్యౌషధం

Posted: 09/08/2015 10:32 AM IST

Ghee health beauty benefits home remedies healthy food items

సాధారణ వంటకాల్లో వినియోగించే నెయ్యి ఆరోగ్యానికి, అందానికి ఎంతో శ్రేయస్కరమని ఆరోగ్య నిపుణులు అంటున్నారు. ఇందులో వుండే పోషకాలు వివిధరకాల వ్యాధుల నుంచి పోరాడి ఆరోగ్యంగా వుంచడంతోపాటు చర్మసమస్యల్ని నివారించడంలో కీలకపాత్ర పోషిస్తాయి. ఇతర ఆరోగ్యకారకాలతో పోల్చితే నెయ్యి దివ్యౌషధంలా పనిచేస్తుంది. అందుకే.. వైద్యులు కూడా తరుచూ ఆహారంలో నెయ్యిని తీసుకోవాల్సిందిగా సలహా ఇస్తారు. ఈ నెయ్యితో కలిగే ప్రయోజనాలేంటో తెలుసుకుందామా..

* కొన్ని చుక్కల ఆలివ్ ఆయిల్‌కి కొన్ని చుక్కలు గోరువెచ్చని నెయ్యి కలిపి, ఆ నూనెను మాడుకు మసాజ్ చేయాలి. తరువాత జుట్టుకు రాసుకోవాలి. పావు గంట తర్వాత తలస్నానం చేయాలి. ఇలా చేయడం వల్ల పొడిబారిన జుట్టును మృదువుగా, ఆరోగ్యవంతంగా చేసుకోవచ్చు.
* నిద్ర సరిపోకపోవడం వలన కళ్ల చుట్టూ నల్లటి వలయాలు ఏర్పడతాయి. పడుకునే ముందు కళ్ల చుట్టూ ఉండే బాగాన్ని నెయ్యితో మసాజ్ చేసుకోవాలి. పొద్దున్నే లేచిన తరువాత ముఖం కడుక్కోవాలి. ఇలా చేయడం వల్ల కళ్ల కింద నల్లటి వలయాలు చాలా త్వరగా పోతాయి.
* పొడిబారిన చర్మం ఉన్న వాళ్లకి నెయ్యి మంచి మాయిశ్చరైజర్‌గా పని చేస్తుంది. స్నానం చేయడానికి నెయ్యితో మసాజ్ చేసుకోవాలి. ఇలా చేయడం వల్ల చర్మం మృదువుగా తయారవుతుంది. తరువాత మాయిశ్చరైజర్ రాసుకోవలసిన అవసరం ఉండదు.
* కొంచెం నెయ్యిని గోరువెచ్చగా వేడి చేసి, చిట్లిన జుట్టుకు రాసుకోవాలి. ఓ గంటసేపు అలాగే వున్న తరువాత కడగాలి. ఇలా చేయడం వల్ల వెంట్రుకల్లో పగుళ్లు పోయి జుట్టు ఆరోగ్యంగా తయారవుతుంది.
* కళ్లకు వేసుకున్న మేకప్‌ని చాలా జాగ్రత్తగా తీసివేయాలి. అందుకు నెయ్యి బాగా ఉపయోగపడుతుంది. కొద్దిగా దూది తీసుకొని నెయ్యిలో ముంచి కళ్ల చుట్టూ ఉండే చర్మాన్ని తుడవాలి.
* ప్రతిరోజూ స్నానానికి ముందు రెండు చుక్కల నెయ్యితో ముఖాన్ని మసాజ్ చేసుకోవాలి. ఇలా చేసుకోవడం వల్ల ముఖం ఫేషియల్ చేసుకున్నట్టుగా మెరిసిపోతుంది.
* కొంచెం శెనగ పిండిలో కొన్ని చుక్కలు నెయ్యి, పాలు పోసి కలిపిన మిశ్రమాన్ని ముఖానికి ప్యాక్‌లా వేసుకోవాలి. 15 నిమిషాల తరువాత కడుక్కోవాలి.
* పెదవులు బాగా పొడిబారినప్పుడు పడుకునే ముందు పెదాలకు నెయ్యి రాసుకోవడం వల్ల అవి చాలా మృదువుగా తయారవుతాయి.