యువ విశ్వవిజేతలకు బిసిసిఐ నజరానా..

Posted: 02/03/2018 04:11 PM IST

ఐసీసీ అండర్-19 ప్రపంచ కప్ ఫైనల్‌ లో యువభారత్ విశ్వవిజేతగా అవతరించిన శుభతరుణంలో భారత క్రికెట్ నియంత్రణ మండలి (బిసిసిఐ) యువభారత జట్టుకు నజరానాను ప్రకటించింది. వరల్డ్ కప్ సాధించి దేశప్రతిష్ఠను నలుదిశలా ఇనుమడింపజేసిన జట్టును ప్రశంసించిన బీసీసీఐ.. నాలుగో పర్యాయం ప్రపంచకప్ ను అందుకోవడంతో భారీ నజరానా ప్రకటించింది. జట్టులోని అటగాళ్లతో పాటు కోచ్ రాహుల్ ద్రావిడ్, సపోర్టింగ్ స్టాప్ లకు కూడా నజరానా అందనుంది.

జట్టులోని ప్రతీ ఆటగాడికి 30 లక్షల చొప్పున నజరానా ప్రకటించిన భారత క్రికెట్ కంట్రోల్ బోర్డు.. జట్టు విశ్వవిజేతగా అవతరించడంలో తన కఠోర శ్రమను, అంకుఠిత దీక్షను పెట్టి విజయతీరాల వైపు నడిపించిన జట్టు ప్రధాన కోచ్ రాహుల్ ద్రవిడ్ కు 50 లక్షలు నజరానాను ప్రకటించింది. దీంతో పాటు జట్టు సహాయ సిబ్బందికి 20 లక్షల చొప్పున బహుమతి ప్రకటించింది.