ముక్కోణపు సిరీస్ ను మలుపుతిప్పిన స్పిన్నర్లు..

Posted: 06/06/2016 07:27 PM IST

ముక్కోణపు వన్డే సిరీస్లో భాగంగా దక్షిణాఫ్రికాపై విజయంతో రెట్టించిన ఉత్సాహంతో అసీస్ పై గెలుపు నమోదు చేస్తారని భావించిన అతిధ్య జట్టుకు కంగారులు కంగారెత్తించారు. విండీస్ అంచనాలను తారుమారు చేసి ఏకపక్ష విజయాన్ని నమోదు చేసుకున్నారు. ఇవాళ వెస్టిండీస్తో జరిగిన మ్యాచ్లో ఆస్ట్రేలియా 6 వికెట్లతో విజయం సాధించింది. ఆసీస్ స్పిన్నర్లు ఆడమ్ జంపా (3/16), నాథన్ లియాన్ (3/39) విజృంభించి విండీస్ బ్యాట్స్మెన్ను కట్టడి చేశారు.

దీంతో తొలుత బ్యాటింగ్ చేసిన కరీబియన్లు 32.3 ఓవర్లలో 116 పరుగులకు ఆలౌటయ్యారు. విండీస్ జట్టులో ఓపెనర్ చార్లెస్ (22) టాప్ స్కోరర్. అనంతరం 117 పరుగుల స్వల్ప లక్ష్యంతో బరిలో దిగిన కంగారూలు 25.4 ఓవర్లలో 4 వికెట్ల నష్టానికి విజయతీరాలకు చేరారు. ఓపెనర్ డేవిడ్ వార్నర్ (55) అజేయ హాఫ్ సెంచరీతో రాణించాడు. విండీస్ బౌలర్ సునీల్ నరైన్ రెండు వికెట్లు తీశాడు. భారీ విజయం సాధించిన ఆసీస్కు బోనస్ సహా 5 పాయింట్లు దక్కాయి. ఈ సిరీస్లో తొలి వన్డేలో వెస్టిండీస్.. దక్షిణాఫ్రికాపై విజయం సాధించింది.