రాజీవ్ ఖేల్ రత్న పురస్కారినికి సానియా

Posted: 08/01/2015 06:55 PM IST

Tennis star sania mirza nominated for khel ratna

హైదరాబాద్ టెన్నిస్ స్టార్, తెలంగాణ బ్రాండ్ అంబాసిడర్ సానియా మిర్జాకు దేశంలోని క్రీడాకారులకు లభించే అత్యున్నత అవార్డు రాజీవ్ ఖేల్ రత్నా పురస్కారానికి ఎంపిక అయ్యింది.సానియాకు రాజీవ్ ఖేల్ రత్నా అవార్డును అందించాలని క్రీడల మంత్రిత్వ శాఖ కేంద్రానికి ప్రతిపాదించింది. శనివారం అవార్డుల కమిటీకి సానియా పేరును కేంద్ర క్రీడాశాఖ మంత్రి సర్భానంద సోనోవాల్ ప్రతిపాదన చేశారు. క్రీడా రంగంలో అధిక పతకాలు సాధించిన క్రీడాకారిణిగా సానియా ఉందని, అందుకే ఆమె పేరును ప్రతిపాదిస్తున్నామని క్రీడా శాఖ కార్యదర్శి అజిత్ శరణ్ అన్నారు.

ప్రస్తుతం తన కెరీర్ లో అత్యుత్తమ ఫామ్ కనబరుస్తున్న సానియా ఇటీవలే మార్టినా హింగిస్ తో జతకట్టి వరుస విజయాలతో దూసుకెళ్తోంది. అయితే అమె ఇటీవల సాధించిన వింబుల్డన్ మహిళల డబుల్స్ టైటిల్ ను పరిగణలోకి తీసుకోకుండానే అమెను రాజీవ్ ఖేల్ రత్నా అవార్డుకు నామినేట్ చేసింది కేంద్ర క్రీడా మంత్రిత్వ శాఖ. 2014 ఏసియన్ గేమ్స్‌, యూఎస్ ఓపెన్‌లో మిక్స్‌డ్ డబుల్స్‌లో బంగారు పతకాల్ని సాధించి దేశ గౌరవాన్ని టెన్నిస్ రంగంలో నలుదిశలా ఇనుమడింప జేసినందుకు గాను అమెను ఖేల్ రత్న అవార్డుకు ప్రతిపాదించినట్లు క్రీడల శాఖ తెలిపింది.

వివిధ వేదికలపై సాధించిన విజయాలతో సానియా పేరుప్రతిష్టలు ఇనుమడించాయి. కాగా ఖేల్ రత్నకు సానియా వ్యక్తిగతంగా దరఖాస్తు చేయసుకోనప్పటికీ.. అమెకు ఈ అత్యున్నత పురస్కారం అందించాలని క్రీడా మంత్రిత్వ శాఖ కేంద్రానికి సిఫార్సు చేసింది. సానియా మిర్జాకు 2004లో అర్జున అవార్డును అందుకోగా, 2006లో పద్మశ్రీ అవార్డులను కేంద్ర ప్రభుత్వం బహుకరించింది. అయితే ఈ సారి సానియా మిర్జాతో పాటు రాజీవ్ ఖేల్ రత్న అవార్డుకు 11 మంది పోటీ పడ్డారు. ఈ పోటీలో స్క్వాష్ ప్లేయర్ దీపికా పల్లికల్, డిస్కస్ త్రోయర్ వికాస్ గౌడ తదితరులు ఉన్నారు.

జి. మనోహర్