నటుడు లారెన్స్ కొత్త పార్టీ పెడుతున్నాడా?

Posted: 02/01/2017 11:19 AM IST

దేశ రాజకీయాల్లో సినీ నటుల ఎంట్రీ అన్నది ఎప్పటికప్పుడు ఆసక్తి కలిగించేందే. తమ గ్లామర్ చరిష్మాతో రాజకీయాల్లో రాటుదేలిన వారు ఎందరో. అదే సమయంలో నావను ఇదలేక చతికిలపడ్డవారు కూడా ఉన్నారు. ఇక దక్షిణాది రాష్ట్రాల్లో ముఖ్యంగా తమిళనాట స్టార్లు పార్టీలను నెలకొల్పడం అన్నది ఎప్పటి నుంచో జరుగుతోంది. ఈ క్రమంలో త్వరలో మరో నటుడు కూడా పొలిటికల్ ఎంట్రీ ఇవ్వబోతున్నాడన్న వార్తలు చక్కర్లు కొడుతున్నాయి.

జల్లికట్లుపై మద్ధతునివ్వటమే కాదు, పోరాటానికి కోటి రూపాయల విరాళం ఇస్తానంటూ ప్రకటించి పెను సంచలనంగా మారాడు నటుడు, కొరియోగ్రాఫర్, దర్శకుడు అయిన లారెన్స్ రాఘవ. అనారోగ్యంగా ఉన్నా లెక్కచేయకుండా తానే స్వయంగా మెరీనా బీచ్ కు వెళ్లి ఆందోళనలో పాల్గొని నిరసనకారులకు మద్ధతునిచ్చాడు. దీంతో లారెన్స్ కు పెద్దన్నయ్య అన్న ట్యాగ్ లైన్ కట్టబెట్టింది తమిళ యువత. గత కొంత కాలంగా ఆయన కూడా రాజకీయాల్లోకి రాబోతున్నాడని, కొత్త పార్టీ స్థాపించబోతున్నాడంటూ వార్తలు వినిపిస్తున్నాయి. దీంతో స్వయంగా మీడియా ముందుకు వచ్చి లారెన్స్ స్పందించాడు. జల్లికట్టుకు మద్ధతుగా నిలిచిన ముఖ్యమంత్రి పన్నీర్ సెల్వంకు కృతజ్నత తెలిపిన లారెన్స్ పొలిటికల్ ఎంట్రీపై క్లారిటీ ఇచ్చాడు.

వాస్తవానికి తనకు రాజకీయాల్లోకి వచ్చే ఆలోచన లేదని తెలిపాడు. ప్రస్తుతం కొంత మంది విద్యార్థులతో కలిసి తాను సేవా కార్యక్రమాలు నిర్వహిస్తున్నానని, రాజకీయ ఆరంగ్రేటం ఇప్పట్లో చేయబోనని స్పష్టం చేశాడు. అయితే తనను నమ్ముకున్న వారికి అన్యాయం జరిగితే పార్టీని స్థాపించడం ఖాయమమంటూ చివర్లో మరో ట్విస్ట్ ఇచ్చాడు. సేవా కార్యక్రమాలు, పిల్లలకు గుండె ఆపరేషన్లు చేయిస్తూ ప్రజల్లో మంచి సింపథీ మూటగట్టుకున్న లారెన్స్ రాజకీయాల్లోకి వస్తే మాత్రం ఆదరణ లభించవచ్చనే పలువురు అభిప్రాయపడుతున్నారు.