వెండితెర జోరు పెంచిన ‘జబర్దస్త్’ ఘాటు భామ

Posted: 09/19/2015 04:43 PM IST

బుల్లితెరపై ఓ వెలుగు వెలిగిన కొందరు యాంకర్స్, తారలు ఆ తర్వాత సినిమాలవైపు తమ దృష్టి సారిస్తున్నారు. అనతికాలంలోనే వారికి భారీ క్రేజ్ తన్నుకురావడంతో అలా అదృష్టం కలిసి వచ్చేస్తోంది మరి! ఈ విధంగా బుల్లితెర నుంచి వెండితెరవైపు అడుగులు వేసిన వారిలో అవికాగోర్, కలర్స్ స్వామి, అనసూయ, ఇంకా తదితరులు వున్నారు. ఇప్పుడు వీరి జాబితాలోకి రష్మీ గౌతమ్ కూడా చేరిపోయింది.

నిజానికి రష్మీ సినిమాల ద్వారే తన కెరీర్ ప్రారంభించింది. గతంలో కొన్ని సిరిమాల్లో మెరిసింది కానీ.. ఆమె నటించిన చిత్రాలన్నీ హిట్ కాకపోవడంతో ఆమెకు ఆఫర్లు తగ్గుముఖం పట్టాయి. అలాగే సైలెంట్ గా వుంటే తన కెరీర్ గాడిలో పడుతుందని భావించిన రష్మీ.. బుల్లితెరవైపు అడుగులు వేసింది. ఈ నేపథ్యంలోనే ఆమెకు ‘జబర్దస్త్’ కామెడీ షోలో యాంకర్ గా అవకాశం వచ్చింది. అప్పటికే బాగా పాపులర్ అయిన ఆ కామెడీ షో నుంచి ఈమెకు ఆఫర్ రావడంతో.. దాన్ని అదునుగా చేసుకుని తన ఇమేజ్ ని మరింత పెంచుకునేందుకు చాలానే ప్రయత్నాలు చేసింది రష్మీ. తన మాటల ప్రతిభతో ప్రేక్షకుల్ని ఆకట్టుకోవడం, ఘాటు అందాలని ప్రదర్శించి కుర్రకారుని మత్తెక్కించడం లాంటి ట్రిక్కులు ప్లే చేసింది. అవే ఇప్పుడు ఆమెను క్రేజును అమాంతం పెంచేశాయి. నిన్నటిదాకా సరైన గుర్తింపు లేకుండా కాలం వెళ్లదీసిన ఈమెకు ఇప్పుడు భారీ స్థాయిలో పాలోయింగ్ పెరిగిపోయింది. దీంతో ఈమెకు సినిమాల్లో నటించే ఆఫర్లు మళ్లీ వరిస్తున్నాయి.

ఈ నేపథ్యంలోనే రష్మీకి ‘గుంటూర్ టాకీస్’, ‘చారుశీల’ సినిమాల్లో హీరోయిన్ గా నటించే బంపరాఫర్లు వరించాయి. ఆ రెండు సినిమాల్లో ఆమె హీరోయిన్ గా నటిస్తోంది. అంతేకాదు.. ఆమెకు కథానాయికగా మరిన్ని అవకాశాలు వస్తుండడంతో తన పూర్తి సమయాన్ని సినిమాలకే కేటాయించాలని రష్మీ డిసైడైపోయిందని చెప్పుకుంటున్నారు. గ్లామర్ తోపాటు చలాకీగా కనిపించే ఈ భామ.. వెండితెరపై తన జోరు పెంచడానికి రెడీ అవుతోందని ఇండస్ట్రీలో అనుకుంటున్నారు.