‘సాంకేతిక హనుమంతుడు’గా మారనున్న విష్ణు

Posted: 08/29/2015 04:59 PM IST

Manchu vishnu hanuman role mythological telugu movies tollywood gossips

ఇండస్ట్రీలో నటీనటులుగా కొనసాగుతున్న వారందరికీ తమకంటూ కొన్ని డ్రీమ్ రోల్స్ వుంటాయి. తమ కెరీర్ లో ఒక్కసారైనా ఆ పాత్రల్లో నటించాలని ఉత్సుకత వారిలో వుంటుంది. అయితే.. అటువంటి కోరికలు ప్రతిఒక్కరికీ పూర్తి కావు. కేవలం కొద్దిమందికి మాత్రమే అవి సాకారమవుతాయి. అలాంటివారి జాబితాల్లో తాజాగా మంచి విష్ణు కూడా చేరనున్నట్లు తెలుస్తోంది. త్వరలోనే ఈ హీరో తన డ్రీమ్ రోల్ లో నటించనున్నట్లు సమాచారం.

‘డైనమైట్’ చిత్రంతో ప్రేక్షకుల ముందుకు త్వరలోనే రానున్న విష్ణు.. ఆ తర్వాత పూర్తిస్థాయి పౌరాణిక చిత్రంలో నటించనున్నాడు. హనుమంతుడి జీవిత చరిత్రగా తెరకెక్కుతున్న ఈ సినిమాలో విష్ణు ప్రధాన పాత్రని పోషించనున్నాడని అంటున్నారు. హనుమంతుడి బాల్యం.. సమస్త దేవతల ఆశీస్సులు ఆయనకి లభించడం.. సీతారాముల సేవలో ఆయన తరించడం.. ఆ తరువాత హిమాలయాలకి వెళ్లడం వంటి ఘట్టాలను భక్తులు కనులముందు సాక్షాత్కరింపజేసుకుంటూ ఉంటారు. అలాంటి హనుమంతుడి జీవితచరిత్రను అంతర్జాతీయ సాంకేతిక నైపుణ్యంతో తెరకెక్కించనున్నట్టు చెబుతున్నారు. తెలుగుతోపాటు తమిళ, ఆంగ్ల భాషల్లో ఈ సినిమాను విడుదల చేసే ఉద్దేశంతో ఉన్నట్టుగా సమాచారం. ఈ సినిమాకి సంబంధించిన పూర్తివివరాలు తెలియాల్సి వుంది.

ఇదిలావుండగా.. గతంలో తనకు పౌరాణిక చిత్రాలంటే ఎంతో ఇష్టమని మంచు విష్ణు వెల్లడించిన సందర్భాలున్నాయి. అయితే.. ఆ తరహా సినిమాలను తెరకెక్కించడం భారీ బడ్జెట్టుతో కూడుకున్న పని కాబట్టి అప్పట్లో వీలు పడలేదు. కానీ.. ఇప్పుడు ‘బాహుబలి’ చిత్రం విడుదలైన తర్వాత ఆ తరహా చిత్రాలపైనే దర్శకనిర్మాతలు, నటీనటులు దృష్టి సారించారు. ఈ నేపథ్యంలో హనుమంతుడి జీవత చరిత్ర ఆధారంగా ఓ పౌరాణిక చిత్రాన్ని తెరకెక్కించేందుకు సన్నాహాలు చేస్తున్నారు. ఈ సినిమా హనుమంతుడి పాత్రలో మంచు విష్ణు నటించే అవకాశం రావడంతో.. అతగాడు సంతోషంతో ఉప్పొంగుతున్నాడని అంటున్నారు. ఈ చిత్రంతో అతని డ్రీమ్ రోల్ కోరిక కూడా తీరనుందని చెప్పుకుంటున్నారు.

AS