సెప్టెంబర్ లో కొరియర్ బాయ్ కళ్యాణ్ ఎంట్రీ ?

Posted: 08/12/2015 10:55 AM IST

‘చిన్నదాన నీకోసం’ వంటి భారీ అట్టర్ ఫ్లాప్ చిత్రం తర్వాత నితిన్ చాలా కాలం గ్యాప్ తీసుకున్నాడు. ఈ సినిమా తర్వాత నితిన్ హీరోగా ఏ ఒక్క ప్రాజెక్టు కూడా సెట్స్ పైకి వెళ్లలేదు. ప్రస్తుతం అక్కినేని అఖిల్ ను హీరోగా పరిచయం చేస్తూ ఓ చిత్రాన్ని తన సొంత బ్యానర్ పై భారీ బడ్జెట్ తో నిర్మిస్తున్నాడు.

అయితే నితిన్ హీరోగా ప్రముఖ దర్శకుడు త్రివిక్రమ్ శ్రీనివాస్ దర్శకత్వంలో ఓ చిత్రం తెరకెక్కనుందని తెలిసింది. కానీ ఈ సినిమా షూటింగ్ ప్రారంభించిన కూడా విడుదల మాత్రం వచ్చే ఏడాది వరకు వేచి చూడాల్సిందే. అంతవరకు నితిన్ సినిమా ఏది కూడా విడుదల కాదనే ఉద్దేశ్యంతో.. తన కొరియర్ సినిమాను విడుదలకు సిద్ధం చేస్తున్నాడు నితిన్.

నితిన్ నటించిన ‘కొరియర్ బాయ్ కళ్యాణ్’ చిత్రం కొన్ని అనివార్య కారణాల వలన విడుదల కాకుండా ఆగిపోయింది. అయితే తాజా సమాచారం ప్రకారం ఈ చిత్రాన్ని త్వరలోనే ప్రేక్షకుల ముందుకు తీసుకురానున్నట్లుగా తెలిసింది. సెప్టెంబర్ మొదటి వారంలో ఈ చిత్ర ఆడియో విడుదల చేసి, చివరి వారంలో సినిమాను విడుదల చేయడానికి చిత్ర యూనిట్ సన్నాహాలు చేస్తున్నట్లుగా తెలిసింది. త్వరలోనే అన్ని వివరాలు అధికారికంగా ప్రకటించనున్నారు.