కోబలిగా కార్తీ కోంబన్ రానున్నాడా?

Posted: 03/09/2015 04:54 PM IST

‘జల్సా’, ‘అత్తారింటికి దారేది’ సినిమాల తర్వాత పవర్ స్టార్ పవన్ కళ్యాణ్, త్రివిక్రమ్ శ్రీనివాస్ కాంబినేషన్లో ఓ సినిమా తెరకెక్కనుందని గతంలో వార్తలొచ్చిన విషయం తెలిసిందే. ఈ చిత్రానికి ‘కోబలి’ అనే టైటిల్ అనుకుంటున్నట్లుగా వార్తలొచ్చాయి. అయితే ఈ టైటిల్ ను తాజాగా తమిళ స్టార్ హీరో దక్కించుకున్నట్లుగా తెలిసింది.

తమిళ స్టార్ హీరో కార్తీకి తమిళంలోనే కాకుండా తెలుగులో కూడా మంచి క్రేజ్ వుంది. ప్రస్తుతం తమిళంలో కార్తీ హీరోగా నటిస్తున్న తాజా చిత్రం ‘కోంబన్’. ముత్తయ్య దర్శకత్వంలో తెరకెక్కుతున్న ఈ చిత్రాన్ని స్టూడియో గ్రీన్ బ్యానర్ పై నిర్మిస్తున్నారు. జివి.ప్రకాష్ కుమార్ సంగీతం అందిస్తున్నాడు.

పల్లెటూరి భారీ యాక్షన్, మాస్ మసాలా కథాంశంతో రూపొందుతున్న ఈ చిత్రాన్ని తెలుగులోకి అనువదించడానికి సన్నాహాలు చేస్తున్నారు. అయితే ఈ చిత్ర తెలుగు వర్షెన్ కోసం ‘కోబలి’ అనే టైటిల్ పరిశీలిస్తున్నట్లుగా తెలిసింది. ఈ సినిమాలో కార్తీ పాత్ర పేరు ‘కోంబన్’ కావడంతో... తెలుగులో అయితే ‘కోబలి’ టైటిల్ అయితే బాగుంటుందని చిత్ర యూనిట్ భావిస్తున్నట్లుగా తెలిసింది.

ఇటీవలే విడుదలైన ట్రైలర్ మరియు పాటలకు మంచి స్పందన వస్తోంది. కార్తీ సరసన లక్ష్మీ మీనన్ హీరోయిన్ గా నటిస్తుంది. త్వరలోనే ఈ చిత్రాన్ని తమిళ, తెలుగు భాషలలో విడుదల చేయనున్నారు. మరి ‘కోంబన్’ సినిమా తెలుగు వర్షెన్ కు ‘కోబలి’ అనే టైటిల్ ఖరారు చేస్తారో లేదో అనే విషయం త్వరలోనే తెలియనుంది.