‘గొంతు’తో ప్రేక్షకులను పిచ్చెక్కించనున్న సంపూ..?

Posted: 02/14/2015 10:43 AM IST

Sampoornesh babu song kobbari matta movie triple role tollywood news

అనతికాలంలో తన ‘మెంటాలిటీ’ ప్రతిభతో మాంచి పాపులారిటీ సంపాదించుకున్న సంపూర్ణేష్ బాబు.. మరోసారి ప్రేక్షకులను పిచ్చెక్కించేందుకు సిద్ధమవుతున్నాడు. ఆనాడు తన ‘హృదయకాలేయం’ మూవీ ట్రైలర్ తో యూట్యూబ్ లో సంచలన రికార్డు నమోదు చేసిన ఈ బర్నింగ్ స్టార్.. ఆ తరహాలోనే మరోసారి రికార్డు సృష్టించేందుకు సన్నద్ధమవుతున్నాడని సమాచారం! ఇప్పటికే తన యాక్టింగ్ తో తెలుగు ప్రజలను ఆకర్షించుకున్న ఈ నటుడు.. ఇప్పుడు తనలోని మరో కళను బయటపెట్టబోతున్నాడు.

ప్రస్తుతం సంపూ ‘కొబ్బరిమట్ట’ అనే చిత్రంలో నటిస్తున్న విషయం తెలిసిందే! ఇందులో ఇతడు ఓ పాట పాడనున్నాడని సమాచారం! ఇప్పటికే ఆ పాట రికార్డింగ్ కూడా పూర్తయ్యిందని యూనిట్ వర్గాలు పేర్కొంటున్నాయి. ఆ పాట చాలా గమ్మత్తుగానూ, ఆకర్షణీయంగానూ వుంటుందని బృందం తెలుపుతోంది. ఈ పాటతో సంపూర్ణేష్ ఇమేజ్ మరింతగా పెరుగుతుందని వారు నమ్మకం వ్యక్తం చేశారు. ఈ పాటను త్వరలోనూ యూట్యూబ్ ద్వారా విడుదల చేయడానికి దర్శకనిర్మాతలు సన్నాహాలు చేస్తున్నారు.

కాగా.. ఈ చిత్రంలో సంపూ పెదరాయుడు, పాపారాయుడు, ఆండ్రాయుడు అనే మూడు పాత్రల్లో కనిపించబోతున్నాడు. ఇటీవలే విడుదలైన ఈ మూవీ ఫస్ట్ లుక్ పోస్టర్ కి కూడా మంచి స్పందన లభించింది. దీంతో ఈ మూవీపై భారీ అంచనాలు పెరిగాయి. షూటింగ్ శరవేగంగా జరుపుకుంటున్న ఈ మూవీని త్వరలోనే విడుదల చేసేందుకు ప్లాన్ చేస్తున్నారు.