కళ్యాణ్ కు నాగ్ దర్శకుడిగా అవకాశం

Posted: 08/28/2014 10:43 AM IST

అక్కినేని నాగార్జున కొత్త దర్శకులకు అవకాశం ఇస్తారనే విషయం అందరికి తెలిసిందే. తన సినిమాలకు దర్శకుడిగా అవకాశం ఇవ్వడానికి మాత్రమే కాకుండా నిర్మాతగా మారి వారిని ప్రోత్సహిస్తున్నాడు. ఇటీవలే ‘ఉయ్యాల జంపాలా’ వంటి సినిమాలతో అటు దర్శకుడు, ఇటు హీరోహీరోయిన్లకు నాగ్ ఓ అవకాశాన్నిచ్చి ప్రోత్సహించారు. ఈ సినిమాకు పి.రామ్మోహన్ కూడా ఓ నిర్మాతగా వ్యవహరించారు.

అయితే తాజాగా మరో వ్యక్తిని కూడా దర్శకుడిగా పరిచయం చేయబోతున్నారు నాగార్జున. కళ్యాణ్ అనే వ్యక్తి ఇటీవలే నాగార్జునకు ఓ కథ వినిపించారట. ఆ కథ నచ్చడంతో తానే ఈ సినిమాను నిర్మించడానికి గ్రీన్ సిగ్నల్ ఇచ్చాడని తెలిసింది. ఇంకా మిగిలిన వివరాలు త్వరలోనే తెలియజేయనున్నారు. ఈ సినిమాను నాగ్ తన సొంత బ్యానరైన అన్నపూర్ణ స్టూడియోస్ పతాకంపై నిర్మించనున్నారు.

అలాగే నటుడి నుంచి ఇటీవలే దర్శకుడిగా మారి ‘ఊహలు గుసగుసలాడే’ వంటి క్లాసికల్ లవ్ స్టోరీని తెరకెక్కించిన దర్శకుడు అవసరాల శ్రీనివాస్ దర్శకత్వంలో నాగార్జున హీరోగా ఓ చిత్రం తెరకెక్కబోతుందని వార్తలు వినిపిస్తున్నాయి. మరి ఈ వార్తలపై కూడా నాగ్ ఇంకా ఎలాంటి అధికారిక ప్రకటన తెలియజేయలేదు. ఈ సినిమాలకు సంబంధించిన అన్ని వివరాలు మరికొద్ది రోజుల్లోనే తెలియజేయనున్నారు.