మహేష్ నాగ్ ఐష్ ల మల్టీ స్టారర్ మణిరత్నం దర్శకత్వంలో

Posted: 01/23/2014 09:55 AM IST

పాతదైనా బంగారం బంగారమే కదా.  ఇప్పటికీ సినిమా డైలాగ్ లలో నువ్వేమైనా ఐశ్వర్యా రాయ్ అనుకున్నావా అని అమ్మాయిని అనటం, నీ ముఖానికి ఐశ్వర్యా రాయ్ కావాలా అని అబ్బాయిని వెక్కిరించటం లాంటివి ఎన్నో వస్తున్నాయంటే ఐశ్వర్యా రాయ్ అందానికి మనవాళ్ళు కట్టిన వెల ఎంతో అర్థమౌతోంది.  అందుకు కారణం పాతబడ్డా తరగని బంగారం విలువే. 

ఒకప్పుడు విభిన్నమైన రీతిలో సినిమాలు తీసి సంచలనాన్ని సృష్టించిన మణిరత్నం కొంతకాలంగా మరుగునేవున్నారు.  అయినా ఆయనదీ పాత బంగారం విలువే సుమా.  అయితే మణిరత్నం తను సినిమా రంగాన్ని వదిలేసిన చోటనే ఆగిపోయినట్లుగా కనపడుతోంది.  అందుకే హీరోయిన్ గా ఐశ్వర్యారాయ్ నే ఎంచుకుంటున్నారు.  అది కూడా మహేబ్ బాబు, నాగార్జున సరసన.   ఇది భారీ యాక్షన్ సన్నివేశాలతో త్రిభాషా చిత్రంగా రూపొందించాలని ఆశపడుతున్నారాయన. 

ఐశ్వర్యారాయ్ ని ఒప్పించటం మణిరత్నానికి కష్టమేమీ కాకపోవచ్చు.  ఎందుకంటే ఆయన మీద నటీనటులందరికీ ఎనలేని అభిమానం ఉంది.  దానికి తోడు రెండవ సారి రంగప్రవేశం చెయ్యటానికి మణిరత్నం కంటే మంచి దర్శకుడు ఎవరు దొరుకుతారు. 

సామాన్యంగా పెళ్ళవగానే సినిమాలకు దూరమవుతుంటారు హీరోయిన్లు.  కానీ బిడ్డను కన్నతర్వాత కూడా ఆమెను హీరోయిన్ గా చూపించాలనుకునే తపన పడుతున్న మణిరత్నం ఆశ ఎంతవరకు ఫలిస్తుందో వేచి చూడవలసిందే! 

దర్శకరత్న దాసరి నారాయణ మాత్రం బాబీ సినిమా తర్వాత రాజేష్ ఖన్నాను పెళ్లాడి సినిమా రంగానికి దూరమైన డింపుల్ కపాడియాను ఒప్పించి హీరోయిన్ వేషం కట్టించినా అది బాక్స్ ఆఫీస్ దగ్గర బోర్లాపడింది.  దాని పేరు జఖ్మి షేర్.  1973 లో విడుదలైన రాజ్ కపూర్ సినిమా బాబీ తర్వాత 1984 లో జఖ్మి షేర్ తో తిరిగి సినిరంగ ప్రవేశం చేసింది డింపుల్ కపాడియా. 

-శ్రీజ