Posted: 08/03/2012 08:18 PM IST

రాజమౌళి, రజనీకాంత్ కాంబినేషన్లో ఓ సినిమా వచ్చే అవకాశం వుందని టాలీవుడ్ లో గాసిప్స్ వినిపిస్తున్నాయి. ఇటీవల ఈగ సినిమా చూసిన రజనీకాంత్, చెన్నయ్ నుంచి ఫోన్ చేసి రాజమౌళీతో అరగంట పాటు మాట్లాడడంతో ఈ ఊహాగానాలకు మరింత బలం చేకూరింది. ఇక్కడో విశేషం కూడా వుంది. రాజమౌళి బాల్యం చెన్నయ్ లో గడవడంతో, చిన్నప్పటి నుంచీ రజనీకి ఆయన అభిమానిగా మారిపోయాడట. రజనీ సినిమాలను తెగ చూసేవాడట.

అలా ఆయనపై అభిమానం పెంచుకున్న రాజమౌళి, ఎప్పటికైనా తన అభిమాన నటుడిని ఓ ధీరోదాత్తమైన పాత్రలో చూపించాలని కలలు కంటున్నాడు. తన మనసులోని మాటను రజనీకి కూడా చెప్పాడనీ, మంచి సబ్జెక్ట్ రెడీ చేయమని రజనీ ప్రోత్సహించాడనీ అంటున్నారు. త్వరలో ప్రభాస్ తో తాను తీయబోయే చిత్రం అయ్యాక, ఇదే పనిపై రాజమౌళి కూర్చుంటాడట. ఒకవేళ ఇదే వాస్తవరూపం దాలిస్తే 100 కోట్లపైనే ఈ సినిమా బడ్జెట్ ఉంటుందని అంచనా వేస్తున్నారు.