Posted: 02/15/2012 04:20 PM IST

కత్రినా కైఫ్ కాదు... నైఫ్’ అని బాలీవుడ్‌లో కొంతమంది ఈ అందాల సుందరిపై విమర్శనాస్త్రాలు సంధిస్తున్నారు. దానికి కారణం కైఫ్ ప్రవర్తన. ఒకప్పుడు ఒక్క చాన్స్ ఇస్తే చాలనుకున్న కత్రినా ఇప్పుడు తనకు నచ్చినవారికి, సౌకర్యవంతంగా అనిపించేవారికి చాన్సులిప్పిస్తున్నారట. ఇటీవల ప్రధానంగా మూడు విషయాల్లో ఆమె గురించి విమర్శలు వచ్చాయి. తను నటిస్తున్న వాణిజ్య ప్రకటనలో ఛాయాగ్రాహకుడిగా రవి కె చంద్రన్ స్థానంలో తన స్నేహితురాలు అయాంకాబోస్‌ని తీసుకోమని కత్రినా సిఫార్సు చేశారట. ఈ యాడ్ నుంచి వైదొలగిన విషయాన్ని చంద్రన్ ట్విట్టర్‌లో పెట్టారు. కానీ దానికి గల కారణాన్ని మాత్రం ఆయన పేర్కొనలేదు.

అయితే అందుకు కారణం కత్రినాయే అన్నది పలువురి ఫీలింగ్. ఈ విషయం అలా ఉంచితే అయన్‌ముఖర్జీ దర్శకత్వంలో రూపొందిస్తున్న ‘ఏ జవానీ హై దివానీ’ చిత్రానికి కత్రినాకైఫ్‌ని కథానాయికగా తీసుకోవాలని ఆమెను సంప్రతించారట కరణ్ జోహార్. చాన్నాళ్లు కరణ్‌ని వెయిటింగ్‌లో పెట్టి చివరికి ‘నో’ చెప్పారట కత్రినా. కరణ్‌లాంటి నిర్మాతను క్యూలో ఉంచడం కరెక్ట్ కాదని, కత్రినా అహంభావానికి ఇది నిదర్శనమని బాలీవుడ్ వర్గాలు ఘాటుగా స్పందిస్తున్నాయి. ఈ వార్తలు విన్న కత్రినా పొరపాటుని గ్రహించారని, అందుకే కరణ్‌ని మచ్చిక చేసుకోవడానికి ఆయన రూపొందించిన ‘అగ్నిపథ్’లో ఐటమ్ పాట ‘చిక్ని చమేలీ...’ చేశారని కూడా ఓ టాక్ ఉంది. ఇలా ఈ రెండు విషయాల్లో విమర్శలకు గురైన కత్రినా తాజాగా ప్రకాష్ ఝాని బాధపెట్టారని సమాచారం. ప్రకాష్ ఝా రూపొందించిన ‘రాజ్‌నీతి’ కత్రినాలోని నటిని నిరూపించింది. ఈ కారణంగా కత్రినాకి ఆయనపట్ల కృతజ్ఞతాభావం ఉండి ఉంటుందన్నది పలువురి ఊహ. కానీ అది ఊహగానే మిగిలిపోయిందని స్పష్టమైందట.

తాజాగా ప్రకాష్ ప్లాన్ చేస్తున్న ‘చక్రవ్యూహ్’లో కత్రినాని కథానాయికగా అడిగారట. అయితే ఈ చిత్రాన్ని నిర్మొహమాటంగా నిరాకరించారట ఈ బ్యూటీ. దానికి కారణం అరక్షణ్’లో డబ్బింగ్ చెప్పినందుకుగాను దీపికాను ఆయన పొగడ్డం కత్రినాకి నచ్చకపోవడమేనని పరిశీలకులు అంటున్నారు. ‘రాజ్‌నీతి’లో తను కూడా డబ్బింగ్ చెప్పుకున్నానని, కానీ ప్రకాష్ ఝా ఈ విషయాన్ని పెద్దగా పట్టించుకోలేదని భావించే కత్రినా ‘చక్రవ్యూహ్’కి నో చెప్పారని కొంతమంది భావిస్తున్నారు. ఏదేమైనా ఈ మూడు సంఘటనల వల్ల తెరపైనే కత్రినా హీరోయిన్... తెరవెనుక విలన్ అని కొంతమంది అంటున్నారు.