Posted: 12/06/2011 04:12 PM IST

రవీనా టాండన్ చిరకాల కోరిక తీరే సమయం దగ్గర పడింది. నిన్నమొన్నటి దాకా తన అందచందాలతో కుర్రకారును కట్టిపడేసిన ఈ బ్యూటీకి ఒక బాలల సినిమా తీయాలనేది ఆశ. ‘జిన్ లియా ఆస్మాన్’ అనే ద్విభాషా చిత్రంతో ఇది నెరవేరబోతోందని రవీనా చెబుతోంది. తల్లీశిశువు మధ్య భావోద్వేగాలకు సంబంధించిన అందమైన సినిమా ఇదని ట్విటర్‌లో రాసుకొచ్చింది.

ఇంతకుముందు బుడ్దా హోగా తెరా బాప్‌లో నటించిన ఈ 37 ఏళ్ల రూపసి.. ఇందులో ఆరేళ్ల బాలుడి తల్లిగా ప్రేక్షకులను అలరించనుంది. జిన్ లియా ఆస్మాన్ హిందీ, మరాఠీ భాషల్లో విడుదలవుతుంది. రవీనా 2003 నుంచి రెండేళ్లపాటు భారత బాలల చలనచిత్రాల సంఘం (సీఎఫ్‌ఎస్‌ఐ) చైర్‌పర్సన్‌గా పనిచేసింది.  అయితే 20 ఏళ్లుగా నటనారంగంలో ఉన్నప్పటికీ ఒక్క బాలల సినిమాలోనూ కనిపించలేదు. ‘సీఎఫ్‌ఎస్‌ఐలో పనిచేసినంత కాలం ‘బాలల సినిమా ఎప్పుడు తీస్తావ్’ అంటూ అందరూ అడిగేవారు.

అప్పటి నుంచే నాకు చిన్నపిల్లల సినిమా తీయాలని ఉండేది. మంచి స్క్రిప్టు, అవకాశం రాలేదు. జిన్ లియా ఆస్మాన్ కథను చదవగానే దానిపై ఎంతో అభిమానం ఏర్పడింది. కాబట్టి దీంతో చిరకాల వాంఛ తీరుతోంది’ అని రవీనా టాండన్ పేర్కొంది. అన్నట్టు రవీనాకు ఆరేళ్ల కూతురు రాషా, నాలుగేళ్ల కుమారుడు రణ్‌బీర్ ఉన్నాడు. 1991లో పత్తర్ కే ఫూల్‌తో ఈమె బాలీవుడ్‌లో అడుగుపెట్టింది.  తదనంతరం మెహ్రా, జిద్దీ, ఖిలాడీయోకా ఖిలాడీ బాక్సాఫీసు వద్ద భారీ విజయాలు నమోదు చేయడంతో ఆమె కెరీర్‌లో విజృంభించింది.

ఇవన్నీ కమర్షియల్ సినిమాలే. అయితే 2000 సంవత్సరం తరువాత సత్తా, ఆక్స్ వంటి సామాజిక ,ప్రయోగాత్మక సినిమాలకు పనిచేయడం ద్వారా విమర్శకుల ప్రశంసలను సంపాదించుకోగలిగింది. దామన్ సినిమాలో నటనకు గాను 2001లో జాతీయ అవార్డును కూడా సొంతం చేసుకుంది. రవీనా కొన్ని తెలుగు చిత్రాల్లోనూ నటించింది