కేవీపీ సూట్ కేసులు.. కేసిఆర్ ఫాంహౌస్ లో?.

Posted: 05/17/2013 11:18 AM IST

దివంగత నేత మాజీ ముఖ్యమంత్రి వైఎస్ రాజశేఖర రెడ్డి ఉన్న సమయంలో ప్రత్యేక తెలంగాణ ఉద్యమం అనిగిపోవటానికి కారణం.. కేవిపీ సూట్ కేసులు మహిమేనని రఘునందన రావు చెబుతున్నారు. తెలంగాణ ఉద్యమాన్ని సూట్ కేసులో కేసిఆర్ బంధించినట్లు ఆయన ఆరోపణలు చేస్తున్నారు.

అంతేకాకుండా ఆ సూట్ కేసులు కేసిఆర్ ఫాంహౌస్ లో భద్రంగా ఉన్నట్లు ఆయన చెబుతున్నారు. ఢిల్లీలోని ఒక హోటల్లో డబ్బులతో కూడిన సూట్‌కేసులను కేవీపి ఇవ్వగా తెరాస ముఖ్యనేతలు వాటిని తీసుకున్నారని రఘునందన్‌ చేసిన ఆరోపణల్లో వాస్తవం ఉండవచ్చనే వ్యాఖ్యానాలు బలం గానే వినిపిస్తున్నాయి.

2004 ఎన్నికల సందర్భం గా కాంగ్రెస్‌ పార్టీతో పొత్తు కుదుర్చుకున్న సందర్భంలో ఈ వ్యవహారం జరిగి ఉండవచ్చనే ఊహాగానాలు వెల్లువెత్తుతున్నాయి. లేదా ఉద్యమ తీవ్రతను తగ్గించాలంటూ కాంగ్రెస్‌ అధిష్టానం కేసీఆర్‌తో కుదుర్చుకున్న ఒప్పందం మేరకు కేవీపి ద్వారా ఈ తతంగం జరిపి ఉండవచ్చని కూడా పలువురు గుసగుసలాడుతున్నారు.

గతంలో సకల జనుల సమ్మె సందర్భంగా లక్ష్యం నెరవేరకముందే ఉద్యోగులతో సమ్మె విరమణ చేయించిన సమయంలో కూడా కేసీఆర్‌పై ఆరోపణలు వినవచ్చాయి. కాంగ్రెస్‌ అధిష్టానంతో కేసీఆర్‌ ఒప్పందం కుదుర్చుకోవడంవల్లే సమ్మె విరమించారనే వార్తలు వచ్చాయి.

అప్పట్లో కేసీఆర్‌, కోదండరాం, పలువురు ఉద్యోగ సంఘాల నాయకులు ఢిల్లీ వెళ్ళి ప్రధానితోపాటు పలు జాతీయ పార్టీల నాయకులను కలిసి తెలంగాణ సమస్యను పరిష్కరించాలంటూ విజ్ఞప్తి చేశారు. అనంతరం కేసీఆర్‌ మినహా మిగిలిన వారంతా హైదరాబాద్‌ తిరిగి వచ్చారు. అప్పట్లో ఒంటరిగా కేసీఆర్‌ ఢిల్లీలో ఉండడంపై విమర్శలు వచ్చాయి. ఢిల్లీలో ఉన్న కేసీఆర్‌ మీడియాకు దూరంగానే ఉన్నారు. కేసీఆర్‌ కాంగ్రెస్‌ అధిష్టానం పెద్దలను కలిసినట్లుగా మీడియాలో వార్తలు వచ్చాయి.

ఆ సందర్భంలో నైనా కేసీఆర్‌ కేవీపీని కలిసి ఉండవచ్చనే చర్చ కొనసాగుతోంది. ఏదేమైనా ఈ రోజు రఘునందన్‌రావు ఏం చేయబోతున్నాడనే అంశం మాత్రం ఆ పార్టీలో, బయట ప్రకంపనలు సృష్టిస్తోంది. కేసిఆర్ పై రాములమ్మ కూడా కోపంగా ఉన్నట్లు టీఆర్ఎస్ కార్యకర్తలు గుసగుసలాడుకుంటున్నారు.