Posted: 03/05/2012 07:32 PM IST

సినిమా పరిశ్రమలో వివాదాలు సహజం. ఇచ్చిన డేట్స్ ప్రకారం నటీనటులు సహకరించలేదనో, ఒప్పందం ప్రకారం నిర్మాత వ్యవహరించలేదనో.. ఇలా రకరకాల వివాదాలు వస్తుంటాయి. తాజాగా అందాల తార శ్రీయకు సంబంధించి ఓ వివాదం జరుగుతోంది. ఇది తెలుగు పరిశ్రమకు సంబంధించినది కాదు. రెండేళ్ల క్రితం మలయాళంలో ఆమె ‘పోకిరి రాజా’ అనే చిత్రంలో నటించారు. మమ్ముట్టి, పృథ్వీరాజ్, శ్రీయ తదితరుల కాంబినేషన్‌లో రూపొందిన ఈ చిత్రం విజయం సాధించింది.

‘పోకిరి రాజా’ అంగీకరించినప్పుడు ఈ చిత్రాన్ని వేరే భాషల్లో అనువదించి విడుదల చేయకూడదని ఆ చిత్రనిర్మాత థామస్ ఆంటోనితో శ్రీయ ఒప్పందం కుదుర్చుకున్నారట. అయితే ఇటీవల ఈ నిర్మాత ఆ ఒప్పందాన్ని గాల్లోకి వదిలేసి, ఈ చిత్ర అనువాద హక్కులను ఓ తమిళ నిర్మాతకు ఇచ్చారట. ఆ నిర్మాత ‘రాజా పోకిరిరాజా’ పేరిట ఈ చిత్రాన్ని అనువదించి విడుదల చేయడానికి సన్నాహాలు చేయడం శ్రీయను షాక్‌కి గురి చేసింది. దాంతో మలయాళ నిర్మాతపై తగిన చర్య తీసుకోవాలని ఆమె నిర్ణయించుకున్నారట.

ఈ క్రమంలో ముందుగా ఈ విషయాన్ని శ్రీయ దక్షిణభారత నటీనటుల సంఘం దృష్టికి తీసుకెళ్లారని ఓ తమిళ పత్రిక ప్రచురించింది. ‘‘పోకిరిరాజాకి సైన్ చేసినప్పుడే వేరే భాషల్లో డబ్ చేయకూడదని ఒప్పంద పత్రం మీద నిర్మాతతో సంతకం పెట్టించాను. కానీ ఇప్పుడీ చిత్రం తమిళ డబ్బింగ్‌కి ఆయన సన్నాహాలు చేయడం బాధ కలిగించింది. అందుకే నటీనటుల సంఘం దృష్టికి తీసుకెళ్లాను. ఇక వేరే ఏ భాషలోనూ ఈ చిత్రాన్ని అనువదించకుండా ‘స్టే’ తేవడానికిగాను కోర్టుని ఆశ్రయించాలనుకుంటున్నా’’ అని శ్రీయ విన్నవించుకున్నారని ఆ పత్రిక ప్రచురించింది.