వందకోట్ల క్లబ్ లోకి పరుగులు తీస్తున్న తోడల్లుళ్లు

Posted: 01/22/2019 07:51 PM IST

F2 fun and frustration 10 days ap ts box office collections

విక్టరీ వెంకటేష్, మెగా ప్రిన్స్ వరుణ్ తేజ్ తొలిసారిగా జంటగా నటించిన పూర్తి హస్యభరిత వినోదాత్మక చిత్రం 'ఎఫ్ 2' (ఫన్ అండ్ ఫ్రస్ట్రేషన్) వంద కోట్ల క్లబ్ లోకి పరుగులు పెడుతుంది. సంక్రాంతి అల్లుళ్లుగా వెంకటేష్, వరుణ్ తేజ్ లు పండించిన కామెడీని తెలుగు ప్రేక్షకులు బాగా అస్వాధిస్తున్నారు. ఈ సినిమా విడుదలైన ప్రతి ప్రాంతం నుంచి హిట్ టాక్ తెచ్చుకుంది. వసూళ్ల విషయంలో పాత రికార్డులను చెరిపేస్తూ.. కొత్త రికార్డులను తిరగరాస్తూ దూసుకెళ్తోంది.

తెలుగు రాష్ట్రాల్లో 70కోట్ల గ్రాస్ ను వసూలు చేసి.. 47 కోట్ల షేర్ ను రాబట్టిందీ సినిమా. ప్రపంచవ్యాప్తంగా చూసుకుంటే ఈ సినిమా నిన్నటితో 90కోట్ల గ్రాస్ ను వసూలు చేసింది. మరికొన్ని రోజుల్లోనే 100 కోట్ల క్లబ్ లోకి చేరిపోవడం ఖాయమనేది ట్రేడ్ పండితుల అంచనా. ఇదే క్రమంలో ఒక్క నైజామ్ లోనే ఈ సినిమా నిన్నటితో కలుపుకుని 16.09 కోట్ల షేర్ ను రాబట్టింది.

త్వరలోనే నైజాం ఏరియాలో 20 కోట్ల షేర్ మార్క్ ను అందుకుంటోందని ట్రేడ్ పండితులు అంచనా వేస్తున్నారు. సీడెడ్ లో రూ. 6.10 కోట్లు, గుంటూరు రూ. 4.03 కోట్లు, తూర్పు రూ.5.44 కోట్లు, పశ్చిమ రూ.3.07 కోట్లు, కృష్ణా రూ.3.97 కోట్లు, నెల్లూరు రూ.1.48 కోట్ల రూపాయల షేర్ రాబట్టింది. ఏదేమైనా, కామెడీ కంటెంట్ కి తిరుగులేదనే విషయాన్ని ఈ సినిమా మరోమారు నిరూపించింది.