వచ్చే ఏడాదిలోనే మహేష్ 25వ చిత్రం

Posted: 12/29/2017 05:26 PM IST

మహేశ్ బాబు అభిమానులంతా తాజా చిత్రమైన 'భరత్ అనే నేను' కోసం ఎంతో ఆత్రుతతో ఎదురుచూస్తున్నారు. కొరటాల లాంటి సక్సెస్ రేటు ఉన్న దర్శకుడు.. పైగా హిట్ కాంబో కావటంతో అంచనాలు బాగానే ఉన్నాయి. కైరా అద్వాని కథానాయికగా నటిస్తున్న ఈ చిత్రం వచ్చే సమ్మర్ కి విడుదల కానుంది.

ఇక ఆ తరువాత మహేశ్ బాబు .. తన మైలు రాయి 25వ సినిమా షూటింగ్ లో పాల్గొంటాడు. అయితే కొరటాల శివ సినిమా కోసం ఎదురు చూడకుండా.. మధ్యలోనే వంశీ పైడిపల్లితో సినిమా చేయనున్నాడు. ప్రస్తుతం అందుకు సంబంధించిన సన్నాహాలు జరుగుతున్నాయి. కథ ప్రకారం ఈ సినిమా షూటింగ్ న్యూ యార్క్ లో ఎక్కువగా జరగనుంది. అందువలన అక్కడి లొకేషన్స్ ను ఎంపిక చేశారు. ఫిబ్రవరి నుంచి ఈ సినిమా రెగ్యులర్ షూటింగ్ మొదలుకానున్నట్టు చెబుతున్నారు.

అశ్వనీదత్ - దిల్ రాజు సంయుక్తంగా నిర్మిస్తోన్న ఈ సినిమాను, దీపావళికి విడుదల చేయాలనే నిర్ణయానికి వచ్చినట్టుగా సమాచారం. మొత్తానికి ఏడాదికి రెండు సినిమాలు అందించాలని ఎప్పటి నుంచో అనుకుంటున్న మహేశ్ బాబు కోరిక వచ్చే ఏడాది నెరవేరే అవకాశాలే ఎక్కువ కనిపిస్తున్నాయి.