పాపులర్ పాటపై చిరాకుపడ్డ బాద్ షా

Posted: 11/24/2016 12:17 PM IST

Shah rukh khan loses his cool after watching ppap song

నలుగురి దారి ఒకటయితే, తన దారి ఒకటని బాలీవుడ్ బాద్ షా షారూఖ్ ఖాన్ మళ్లీ నిరూపించుకున్నాడు. ప్రపంచం అంతా ఓ పాటతో ఊగిపోతుంటే, అది షారూఖ్ కి ఏ మాత్రం నచ్చలేదంట. అదసలేం ఏం పాట అంటూ ఓ ఇంటర్వ్యూలో బహిరంగంగానే సెటైర్లు వేసేశాడు.

డియర్ జిందగీ చిత్ర ప్రమోషన్ కోసం షారూఖ్, అలియాలు ఓ ఇంటర్వ్యూలో పాల్గొన్నారు. ఈ సందర్భంగా యాంకర్ కొన్నిరాపిడ్ ఫైర్ ప్రశ్నలు సంధించింది. ఈ క్రమంలో పీపీఏపీ (పెన్-పైనాఫిల్-ఆపిల్-పెన్) అనే ఓ పాట గురించి ప్రస్తావన వచ్చింది. ఇంతకీ ఆ పాట ఏంటంటే... జపాన్ కు చెందిన కోసాకా డైమ్యూవో అనే డీజే ఒకరు ఈ పాటను రూపొందించాడు. పీకో-టారో అనే కల్పిత పాత్ర ధరించిన కోసాకా గోల్డ్ కలర్ దుస్తులు, చిన్న మీసాలు ధరించి.. ఐ యావ్ పెన్, పైనాఫిల్, యాపిల్, పెన్... అంటూ స్టెప్పులేస్తుంటాడు.

అక్టోబర్ 7 న వరల్ట్ వైడ్ గా రిలీజ్ అయిన ఈ ఆల్బమ్ యూట్యూబ్ లో సంచలనంగా మారింది. ట్యూన్ లో పదాలు క్యాచీగా ఉండటంతో రెండు కోట్ల మందికి పైగానే వీక్షించారు కూడా. దీంతో దీనికి సంబంధించిన ప్రశ్నను సంధించారన్న మాట. ఆపై షారూఖ్ తెలీదని సమాధానం ఇచ్చేసరికి ఆ వీడియోను చూపించారు అంతే...

అదసలు పాటా? ఇలాంటి పాటలు చూపించి నా టైం ఎందుకు వేస్ట్ చేస్తారు? అతనసలు ఏం చేస్తున్నాడు? నేను రోజు బాత్ రూంలో ఇలాంటి పాటలే పాడుతుంటాను. ఈ సోషల్ మీడియాలో జనాలకు ఏమైంది? ఎందుకు ఆ పాటను అంతగా పాపులర్ చేస్తున్నారు? అంటూ కాస్త అసహనం ప్రదర్శించాడు. పక్కనే ఉన్న అలియా కూడా షారూఖ్ తో తందాన అంటూ ఓదార్చే ప్రయత్నం చేసింది. ఇదంతా చూసిన వాళ్లు బాద్ షా బుద్ధి ఇక మారబోదంటూ పెదవి విరుస్తున్నారు.