రోడ్డు ప్రమాదంలో సినీ దర్శకుడు మృతి

Posted: 05/25/2016 11:49 AM IST

ప్రముఖ తమిళ దర్శకుడు దేవరాజు(60) మృతి చెందారు. కర్నూలు జిల్లా డోన్ హైవే ఓబులాపురం మిట్ట వద్ద జరిగిన రోడ్డు ప్రమాదంలో ప్రాణాలు కోల్పోయారు. కోయంబత్తూరు నుంచి దేవరాజు తన స్నేహితులతో కలిసి హైదరాబాద్ బయలుదేరారు. ముందుగా బెంగుళూర్ వచ్చి, ఆ తర్వాత అక్కడి నుంచి హైదరాబాద్ కు వస్తుండగా రాత్రి మార్గ మధ్యంలో ఓబులాపురం మిట్ట హైవే వద్ద కారు ప్రమాదానికి గురయ్యింది.

ఈ కారు ప్రమాదంలో దేవరాజు అక్కడికక్కడే మృతిచెందారు. కారులో వున్న దేవరాజు స్నేహితులకు స్వల్ప గాయాలతో బయటపడ్డారు. దేవరాజు మృతదేహాన్ని ముందుగా డోన్ హాస్పిటల్ కు తరలించి, ఆ తర్వాత కోయంబత్తూరుకు తరలించారు. దర్శకుడిగా దేవరాజుకు మంచి పేరుంది. తమిళంలో సింధురపువ్వు వంటి హిట్ చిత్రాలను అందించారు.

మూడు దశాబ్దాల పాటు తమిళంలో ఎన్నో సూపర్ హిట్ సినిమాలకు దర్శకత్వం వహించారు. ప్రస్తుతం తమిళంలో సీరియల్స్ కు దర్శకుడిగా పనిచేస్తున్నారు. ఈ మరణ వార్తతో తమిళ సినీ ఇండస్ట్రీ ఒక్కసారిగా షాక్ గురయ్యారు. తమిళ సినీ ఇండస్ట్రీ ఒక మంచి దర్శకుడిని కోల్పోయిందని చెప్పుకోవచ్చు.