నూతన సంప్రదాయానికి మోడీ శ్రీకారం చుట్టారు..

Posted: 12/07/2014 10:12 PM IST

Chandrababu supports modi on planning commission issue

భారత ప్రధాని నరేంద్రమోదీ నూతన సంప్రదాయానికి శ్రీకారం చుట్టారని ఆంధ్రప్రదేశ్ ముఖ్యమంత్రి చంద్రబాబునాయుడు అన్నారు. రాష్ట్రాల ముఖ్యమంత్రులతో ప్రధాని సమావేశం అనంతరం దిల్లీలో చంద్రబాబు మాట్లాడారు. ప్రణాళిక సంఘం నామమాత్రంగా, దిశాదశ నిర్దేశించే పరిస్థితి లేకుండా ఉందని అన్నారు. ప్రత్యామ్నాయ వ్యవస్థ కోసం ప్రధాని ఆలోచించారన్నారు. ఆర్థిక సంస్కరణలు ప్రారంభించాక అభివృద్ధి జరిగిందన్నారు. గడిచిన పదేళ్లలో మొత్తం వ్యవస్థలన్నీ భ్రష్టుపట్టాయని, వ్యవస్థలో లోపం వల్లే సరైన నిర్ణయాలు తీసుకోలేకపోయారని అన్నారు. విజన్ 2050 తయారు చేసుకోవాల్సిన అవసరం ఉందన్నారు.

పేదరిక నిర్మూలన, ఆర్థిక అసమానతలు తగ్గించాలని చంద్రబాబు అన్నారు. నాయకులు ఎన్నికల కోసం కాకుండా ప్రజల కోసం పనిచేయాలని తాజా సమావేశంలో తాను సూచించినట్లు తెలిపారు. మాజీ ప్రధాని మన్మోహన్‌సింగ్ కూడా ప్రణాళిక సంఘం సరిగా పనిచేయడం లేదని అన్నారని, ప్రస్తుత సమావేశంలో కాంగ్రెస్ నాయకులు మినహా మిగిలిన అందరూ కొత్త విధానానికి మద్దతు తెలిపారని వివరించారు. నూతన సంస్కరణలు అమలైతే ప్రపంచంలో భారత్ ఒకటి లేదా రెండో స్థానంలో ఉంటుందని ధీమా వ్యక్తం చేశారు. రాజకీయాలకంటే అభివృద్ధే ముఖ్యమని స్పష్టం చేశారు. రాజధాని విషయాన్ని ప్రత్యేకంగా ప్రస్తావించినట్లు సీఎం చంద్రబాబు తెలిపారు.

జి.మనోహర్