రుణమాఫీ జాప్యంతో పంటభీమా కోల్పోయిన రైతులు

Posted: 09/30/2014 03:40 PM IST

Farmers lost crop insurance due to crop loan delay

రుణమాఫీ అమలు జాప్యం కావడంతో రైతులు పంట బీమాను కోల్పోయారని కాంగ్రెస్ ఎమ్మెల్సీ షబ్బీర్ అలీ ఆవేదన వ్యక్తం చేశారు. తెలంగాణలో ఇప్పటివరకు బ్యాంకుల్లో రైతులకు రుణమాఫీ కింద చెల్లించాల్సిన నగదు జమ కాలేదని ఆయన ఆరోపించారు. ఓ వేళ ప్రభుత్వం ఒకటి, రెండు రోజుల్లో ఆ నిధులు విడుదల చేసినా.. వాటిని ప్రాసెస్ చేయడానికి 10 రోజులు పడుతుందని, దీంతో రైతులు వారికి లభించే పంట భీమాను కోల్పోయినట్టేనన్నారు.

తెలంగాణలో రైతాంగాన్ని ఓ వైపు వర్షాభావ పరిస్థితులు మరో వైపు విద్యుత్ కోతలు తీవ్రంగా దెబ్బతీశాయన్నారు. మొక్కజొన్న, వరి పంటలు పూర్తిగా చేతికందకపోవడంతో రైతులు ఆందోళన చెందుతున్నారని అన్నారు. ప్రభుత జాప్యం చేయడం వల్ల రైతులు పంట నష్టపరిహారాన్ని పొందలేకపోతున్నారని అన్నారు. ఈ సమస్యపై బ్యాంకర్లతోనూ, కేంద్రంతోనూ మాట్లాడి రైతులకు లబ్ది చేకూర్చాలని సీఎం కేసీఆర్ను డిమాండ్ చేశారు. రైతాంగాన్నితీవ్రంగా కుదిపేస్తున్న ఈ సమస్యను పరిష్కరించడానికి తక్షణమే అఖిలపక్ష సమావేశం ఏర్పాటు చేయాలని షబ్బీర్ అలి ప్రభుత్వానికి సూచించారు.

జి. మనోహర్