జైల్లో కాంపస్ సెలక్షన్

Posted: 04/10/2013 08:02 AM IST

జైల్లో పెట్టటమంటే కేవలం నేరానికి శిక్షగా మాత్రమే కాదు వారిలో పరివర్తన రావలన్నది కూడా ధ్యేయమే.  పరివర్తన వచ్చి వాళ్ళు నాగరికులుగా బయట ప్రపంచంలో మెలగగలరనే నమ్మకం కలిగినప్పుడు వాళ్ళకి బ్రతకటానికి ఒక దారి చూపించటం కూడా అవసరమే.  బయటకు పోయి ఏ దారి లేక మళ్ళీ నేరాలకు పాల్పడకుండా ఉండాలంటే వాళ్ళని జనజీవన స్రవంతిలోకి వచ్చే మార్గాన్ని సుగమం చెయ్యాలి.  అటువంటి ప్రయత్నమే ఢిల్లీలోని తీహార్ జైల్లో జరిగింది.

నిన్న తీహార్ జైల్లో నిర్వహించిన కాంపస్ సెలక్షన్స్ లో హాజరైన 15 కంపెనీలు 30 మంది ఖైదీలను ఉద్యోగానికి ఎంపిక చేసాయి.  నిజానికి 30 కంపెనీల నుంచి కాంపస్ సెలక్షన్స్ నిర్వహించవలసివుండగా 15 కంపెనీల ప్రతినిధులే హాజరై ఇంటర్వ్యూలను నిర్వహించారు.  ఎంపికైన ఉద్యోగులలో సేల్స్ మెన్, డేటా ఎంట్రీ ఆపరేటర్స్, మార్కిటింగ్ ఇతర ఎగ్జిక్యూటివ్స్ ఉన్నారు. 

పోయిన సంవత్సరం తీహార్ జైల్ నుంచి 142 మంది ఉద్యోగాలు సంపాదించుకున్నారు.  అందులో సంవత్సరానికి 3.6 లక్షల ప్యాకేజి పొందినవారు కూడా ఉన్నారు.  12000 మంది ఖైదీలున్న పశ్చిమ ఢిల్లీ లోని తీహార్ జైల్ లో కరడుగట్టిన ఉగ్రవాదులు, భారీ అవినీతికి పాల్పడ్డవారితో సహా ఎంతో మంది జైలు శిక్షననుభవించారు.  అందులో నడవడిక బావుండి, వచ్చే ఆరునెలలలో విడుదల కానున్న ఖైదీలకు, విద్యార్హతలుండి ఉద్యోగం చెయ్యగలిగే వయసులో ఉన్నవారి కోసం 2010 నుంచి ఖైదీల పునరావాస యోజనలో ఇలా క్యాంపస్ సెలక్షన్స్ ని నిర్వహిస్తూ వస్తున్నారు. 

ఇక, నియమాలకనుగుణంగా, ఖైదీల ముద్రవేసుకుని ఉండకుండా వాళ్ళకి ఉద్యోగులుగా సమాజంలో గుర్తింపు రావటం కోసం వారి గత చరిత్రను, గుప్తంగా ఉంచుతారు.  ఒకసారి నేరం చేసినంత మాత్రాన జీవితాంతం నేరస్తుడిగానే ఉండకుండా సామాన్య జీవన స్రవంతిలో కలిసిపోయే విధానాలలో క్యాంపస్ సెలక్షన్స్ ఒకటి.

-శ్రీజ