ఆంధ్రప్రదేశ్ కు అక్షింతలు

Posted: 04/10/2013 10:28 AM IST

Ap state ridiculed by union scheduled tribes welfare minister

రాష్ట్రంలో ఏజెన్సీ ప్రాంతాల్లో బాక్సైట్ మైనింగ్ ని అడ్డుకోవటంలో ఆంధ్రప్రదేశ్ ప్రభుత్వం విఫలమైందని కేంద్ర గిరిజన సంక్షేమ వ్యవహారాల మంత్రి కిషోర్ చంద్ర దేవ్ మండిపడ్డారు. చట్టాన్ని అతిక్రమించటమే కాకుండా బడాబాబులు అడవిలో నివసించే గిరిజనుల జీవన శైలిలో అంతరాయం కలిగిస్తున్నారంటూ ఆయన ఆగ్రహాన్ని వ్యక్తంచేసారు.

షెడ్యూల్ 5 ప్రాంతాల్లో మైనింగ్ హక్కులను రాష్ట్రప్రభుత్వం ఎమ్ఓయూల ద్వారా గిరిజనేతరులకు ప్రసాదించటం వలన అవినీతికి చోటిస్తూ, శాంతిభద్రతల విఘాతానికి దోహదం చేస్తోందని ఆయన అన్నారు.

అలాంటి ఎమ్ఓయూలు పార్లమెంటు నుంచి కానీ శాసనసభ నుంచి కానీ వెలువడిన శాసనాలు కావు కాబట్టి, అవి కేవలం రెండు పార్టీల మధ్య జరిగిన ఒప్పందమే అవటం వలన, గిరిజనుల సంక్షేమం దృష్ట్యా, భారత రాజ్యాంగంలోని ఆర్టికిల్ 244 ఇచ్చిన అధికారాలను వినియోగించుకుంటూ గవర్నర్ లు అటువంటి ఒప్పందాలను రద్దు చేయవచ్చునని సూచిస్తూ, వెంటనే సముచిత చర్య తీసుకోవలసిందిగా కోరుతూ కిషోర్ చంద్ర దేవ్, అన్ని రాష్ట్ర గవర్నర్లకూ లేఖలను పంపించారు.

ఏజెన్సీ లైన షెడ్యూల్ 5 ప్రాంతాలలో దృష్టి సారించకుండా అధికారంలో ఉన్నవారంతా అక్కడ జరుగుతున్న కార్యకలాపాలను విస్మరించటానికి కారణం, వారంతా నగరవాసులు కాబట్టి అంటూ కిషోర్ చంద్రదేవ్ విమర్శిస్తూ, అందుకు పరిష్కారంగా సత్వర చర్యలను తీసుకుని ఆ తర్వాత రాటిఫికేషన్ కోసం రాష్ట్రపతికి పంపించవచ్చునని కూడా ఆయన గవర్నర్లకు సూచించారు.

-శ్రీజ