Posted: 03/29/2013 08:48 AM IST

సమాజ్ వాది పార్టీ అధ్యక్షుడు ములాయమ్ సింగ్ యాదవ్ భవిష్యవాణిని గట్టిగా వినిపించారు. పార్టీ కార్యకర్తలతో మాట్లాడుతూ, నవంబర్ లోనే ఎన్నికలు వచ్చేస్తాయని, ఫలితాలు తమకు అనుకూలంగా ఉంటాయని చెప్పారాయన. ఉత్తర్ ప్రదేశ్ లో ఎన్నో ఆశలు పెట్టుకున్న కాంగ్రెస్ పార్టీకి స్థానమివ్వకుండా, పాతుకుపోయాననుకున్న బహుజన సమాజ్ వాది పార్టీ అధ్యురాలు మాయావతిని గద్దె దించి, మంచి మెజారిటీతో గెలిచి ఉత్తర్ ప్రదేశ్ లో ఊహించని రీతిగా పగ్గాలందుకున్న ములాయమ్ సింగ్ యాదవ్, అదే పద్ధతిలో కేంద్రంలో కూడా జెండా పాతగలమనే ధైర్యాన్ని పార్టీ శ్రేణుల్లో నింపారు.

కేంద్రంలో కాంగ్రెస్ మిత్రపక్షాల కూటమి కానీ, లేదా భారతీయ జనతా పార్టీ కూటమి కానీ రాదని, తృతీయ పక్షమిదే గెలుపని ఢంకా మోగించినట్లుగా చెప్పారు ములాయమ్ సింగ్ యాదవ్. ఉత్తర్ ప్రదేశ్ లో శాంతి భద్రతలు లేవంటూ కాంగ్రెస్ పార్టీ వేస్తున్న రంకెలు కేవలం రాజకీయ లబ్ధికోసం చేస్తున్నవే అన్నారాయన.

అందుకు ప్రతిగా కాంగ్రెస్ ప్రభుత్వం తన యోజనలలో తాను ముందుకెళ్తోంది. ఆర్థిక మంత్రి చిదంబరం ఈ రోజు యుపి లో 300 కొత్త బ్యాంక్ బ్రాంచ్ లను ప్రారంభిస్తున్నారు. జూన్ లో మరో 450, సెప్టెంబర్ లో 600, డిసెంబర్ లో 750, మార్చి 2014 లో 900 బ్యాంకుల కొత్త బ్రాంచ్ లు ప్రారంభించాలనే యోజనలో ఉన్నారు. గ్రామాభివృద్ధి కోసం చేయబోయే ఈ బ్యాంక్ ల ప్రారంభాల వలన 1598 గ్రామాలకు సౌకర్యం కలుగుతుందని అంచనా.

ప్రధాన మంత్రి మన్మోహన్ సింగ్ కూడా డిఎమ్కే యుపిఏ ప్రభుత్వం జట్టు కట్ చేసుకున్నా, ఎన్నికలు మాత్రం జరగాల్సిన సమయంలో జరుగుతాయంటూ ధీమాను వ్యక్తం చేసారు. మిత్రపక్షమైన డిఎమ్కే ఉపసంహరణతో యుపిఏ కాస్త చిక్కున పడ్డ మాట వాస్తవమే కానీ ప్రభుత్వం ఏదో విధంగా గట్టెక్కి తన టెన్యూర్ మొత్తం నడిపిస్తుందనే నమ్మకం తనకుందని ఆయన అన్నారు.

 

-శ్రీజ