Posted: 03/22/2013 03:28 PM IST

పరువు దక్కించిన ఇటాలియన్ల మీద వరాలు గుప్పించిన ప్రభుత్వం.

లోక్ సభలోనూ రాజ్యసభలోనూ భారత విదేశాంగ మంత్రి సల్మాన్ ఖుర్షీద్ ఇటలీ నావికాధికారుల ఆగమనాన్ని, వాళ్ళ కేసు తీవ్రమైనది కాదు కాబట్టి వాళ్ళకి మరణ శిక్ష ఉండదని తెలియజేసారు.  వాళ్ళ నావికులు భారత్ కి వచ్చిన తర్వాత వాళ్ళమీద భారత్ వ్యవహారం ఎలా ఉండబోతుందన్న విషయాన్ని ఇటలీ ప్రభుత్వం అడిగి తెలుసుకుందట.  అప్పుడు భారత ప్రభుత్వం, వారికి మరణ దండనైతే ఉండదన్న హామీ ఇచ్చిందన్నారాయన.  సుప్రీం కోర్టు ఇచ్చిన గడువు లోపులో వారు భారత్ కి తిరిగి వస్తే వారిని పోలీస్ అదుపులోకి తీసుకోవటం ఉండదనన్న హామీ కూడా ఇచ్చామని ఖుర్షీద్ తెలియజేసారు.

ఈ రోజు ఉదయం సల్మాన్ ఖుర్షీద్ కేరళలో మత్స్యకారులను చంపిన ఇటాలియన్ నావికులు తిరిగి వచ్చే విషయంలో మీడియా ప్రతినిధులతో మాట్లాడుతూ, భారతదేశ దౌత్య సంప్రదింపులు పనిచేస్తున్నాయని, వాళ్ళు వస్తున్నారని  అన్నారు.

ఇదన్న మాట వాళ్ళు చేసిన సంప్రదింపులు. వాళ్ళని రప్పించటం కోసమే అలా మాట్లాడివుంటే సరేనేమో కానీ, ప్రతిపక్షాల ఆందోళన భరించలేక ప్రస్తుతం ఈ గండం నుంచి బయటపడదామని అనుకుంటూ నిందితులను తిరిగి రప్పించటానికి ఎడాపెడా వాగ్దానాలు చేస్తే, అదే ప్రతిపక్షాలతో ఆ తరువాతనైనా గొడవ తప్పదు.

అత్యుత్సాహంతో మత్స్యకారులను కాల్చి చంపి, వాళ్ళు సముద్ర దొంగలనుకున్నాం అంటే, అంత చిన్న చేపల బోటులో వచ్చి అంత పెద్ద నావలోని వారి సరుకులను దొంగిలించుకుని పోతారని ఎలా అనుకున్నారు.  అయినా వీళ్ళ నావ మీదకు ఎక్కటానికేమైనా ప్రయత్నం చేసారా వాళ్ళు.

ఇచ్చిన అప్పును తిరిగి తీసుకోవటానికి ఒక్కోసారి, కావాలంటే మళ్ళీ ఇస్తామంటూ వాగ్దానాలు చేస్తారు.  ఆ తర్వాత ఇవ్వకపోయినా వాళ్లని ఏమీ చెయ్యలేరు కనుక.  కానీ ఒక దేశం మరో దేశానికి చేసే వాగ్దానం సరిగ్గా ఉండాలి. విచారణ జరుగక ముందే దాని పర్యవసానాన్ని ఎలా చెప్పగలరు. మరి న్యాయస్తానాలున్నయెందుకు.

అసలు సరైన హామీ లేకుండా ఒప్పంద పత్రాలు లేకుండా నిందితులను ఇటలీకి పంపించటమే చేసిన మొదటి తప్పు. దాన్ని కప్పిపుచ్చుకోవటానికి మరో తప్పు చేస్తే ప్రస్తుతానికి ఒక సమస్య తీరినట్లే ఉంటుంది కానీ భవిష్యత్తులో ఎదురుతిరిగే అవకాశం ఉంది.

-శ్రీజ