Posted: 02/22/2013 08:00 PM IST

 కసబ్ ను ఉరితీసినప్పుడు  హోం మంత్రి సుశీల్ కుమార్  షిండే ను మెచ్చుకున్న బీజేపి నాయకులు ఇప్పుడు  ఆయన కామెంట్ చేస్తున్నారు. హైదరాబాద్‌లో పేలుళ్ల ఘటనపై హోంమంత్రి షిండే ప్రకటనపై బీజేపీ సీనియర్ నేత సుష్మాస్వరాజ్ అసంతృప్తి వ్యక్తం చేశారు. హోంమంత్రి ప్రకటన రొటీన్‌గా ఉందని, ఘటన తీవ్రతకు తగినట్లుగా లేదని ఆమె విమర్శించారు. ఉగ్రవాదుల నుంచి సమాచారం ఉంటే కేంద్ర, రాష్ట్ర ప్రభుత్వాలు ఎందుకు చర్యలు తీసుకోలేదని ఆమె ప్రశ్నించారు. మళ్లీ ఇలాంటి ఘటనలు జరగకుండా ఏం చర్యలు తీసుకుంటున్నారో చెప్పలేదని ఆమె మండిపడ్డారు.షిండే ప్రకటనపై విపక్షాలు ఆగ్రహం వ్యక్తం చేశాయి. పేలుళ్ల ఘటన ప్రకటనపై సుష్మా స్వరాజ్ అభ్యంతరం వ్యక్తం చేశారు. పేలుళ్ల పైన ప్రకటనలు చేసి చేతులు దులిపేసుకోవడం కాదని, ఎక్స్‑గ్రేషియా ఇవ్వటంతో సమస్య పరిష్కారం కాదని, ఉగ్రవాద చర్యలు అరికట్టేందుకు ఏం చర్యలు తీసుకున్నారో చెప్పాలని ఆమె కేంద్రాన్ని ప్రశ్నించారు. అంతకుముందు లోక్‌సభ జీరో అవర్‌లో సుష్మా మాట్లాడుతూ బాంబు పేలుళ్ల ఘటనపై ఆవేదన వ్యక్తం చేశారు. పేలుళ్ల ఘటన అత్యంత విషాదకరమన్నారు. ఉగ్రవాదాన్ని నిరోధించేందుకు ఐక్యంగా పోరాడుదామని ఆమె దేశ ప్రజలకు పిలుపునిచ్చారు.

అమాయకుల ప్రాణాలను బలితీసుకోవడంలో ఉగ్రవాదులు పైచేయి సాధిస్తున్నారని పేర్కొన్నారు. కేంద్రం వద్ద బాంబు దాడులు జరుగుతాయన్న సమాచారం ఉన్నా, ఘటనలు జరుగుతూనే ఉన్నాయని ఆగ్రహం వ్యక్తం చేశారు. ఉగ్రవాదానికి మతం దృష్టితో చూడరాదని సుష్మాస్వరాజ్ అన్నారు. అక్బరుద్దీన్ వ్యాఖ్యలకు, ఈ పేలుళ్లకు ఏమైనా సంబంధం ఉందా? అని ఆమె ప్రశ్నించార. హైదరాబాద్, ముంబై, బెంగుళూరులో పేలుళ్లు జరుగుతాయని ఉగ్రవాదులు హెచ్చరించారు. ముంబై, బెంగుళూరులో జరగ కుండా ఎలాంటి చర్యలు తీసుకుంటున్నారో చెప్పాలని సుష్మా డిమాండ్ చేశారు.