Posted: 02/01/2013 01:26 PM IST

సిరియాలో దాదాపు రెండేళ్లుగా కొనసాగుతున్న అంతర్యుద్ధం చినికి చినికి గాలివానగా మారుతోంది. సామ్రాజ్యవాద అమెరికా పరోక్ష జోక్యంతో పశ్చిమాసియాలో వాతావరణం క్రమంగా వేడెక్కుతోంది. యుద్ధ మేఘాలు ఆవరించుకుంటున్నాయి. అమెరికా దన్నుతో సిరియాపై ఇజ్రాయిల్‌ కాలు దువ్వుతోంది. ముందుగా తానే సిరియా పశ్చిమ భాగంలోని ఒక సైనిక స్థావరంపై వైమానిక దాడులు ప్రారంభించింది. డెమాస్కస్‌ వాయవ్య ప్రాంతంలో వున్న ఒక భవనాన్ని లక్ష్యంగా చేసుకుని బాంబుల వర్షం కురిపించిన ఇజ్రాయిల్‌ యుద్ధ విమానాలు ఒక భవనాన్ని తునా తునకలు చేశాయి. సిరియా సైన్యం ఉపయోగిస్తున్న శాస్త్ర పరిశోధనా కేంద్రాన్ని యుద్ధ విమానాలు ధ్వంసం చేశాయని, ఇందులో ఇద్దరు ఉద్యోగులు మరణించగా మరో ఐదుగురు తీవ్రంగా గాయపడ్డారని సిరియన్‌ అరబ్‌ వార్తా సంస్థ వివరించింది.

లెబనాన్‌లోని హిజ్బుల్లా తిరుగుబాటుదారులకు సిరియా ఆయుధాలు పంపుతున్నందునే తాము దాడి చేశామని ఇజ్రాయిల్‌ చేసిన ప్రకటనను అమెరికా గట్టిగా సమర్ధించింది. అయితే సిరియా ప్రభుత్వం ఈ ఆరోపణలను తోసిపుచ్చింది. అమెరికా నుండి ఏటా వందల కోట్ల డాలర్ల సైనిక, ఆర్థిక సాయాన్ని అందుకుంటున్న ఇజ్రాయిల్‌ అమెరికాలోని రింగ్‌మాస్టర్ల అనుమతి లేనిదే ఇటువంటి కవ్వింపు చర్యలకు దిగబోదన్న వాదనలు గట్టిగా వినిపిస్తున్నాయి.