టీవి9 మాజీ సీఈఓ రవిప్రకాష్ కు రూ.10 లక్షల జరిమానా.!

Posted: 06/16/2022 06:59 PM IST

టీవీ9 మాజీ సీఈవో రవిప్రకాష్‌కు ఎదురుదెబ్బ తగిలింది. ఆయన దాఖలు చేసిన పిటీషన్ ను విచారించిన జాతీయ కంపెనీ లా ట్రైబ్యునల్ (ఎన్సీఎల్టీ) హైదరాబాద్ బెంచ్ షాకిచ్చింది. ఆయన పెట్టుకున్న పిటిషన్‌ను కొట్టేసివేసిన లా ట్రిబ్యూనల్ ఆయనకు రూ. 10 లక్షల జరిమానా విధించింది. టీవీ9కు చెందిన ఏబీసీ ప్రైవేటు లిమిటెడ్ వాటాల కొనుగోలులో అక్రమాలు జరిగాయని, సంస్థను స్వాధీనం చేసుకున్న వారిని నియంత్రించాలంటూ రవిప్రకాష్, కేవీఎన్ మూర్తి పిటిషన్ దాఖలు చేశారు. సుదీర్ఘ వాదనల అనంతరం ట్రైబ్యునల్ నిన్న తీర్పు వెలువరించింది.

రవిప్రకాష్ సహా కేవీఎస్ మూర్తి దాఖలు చేసిన పిటీషన్ ను విచారించిన లా ట్రిబ్యూనల్ టీవీ9 వాటాల కొనుగోలులో ఎలాంటి అవకతవకలు జరగలేదని, అన్నీ చట్టబద్ధంగా జరిగాయని తేల్చి చెప్పింది. భాస్కర పంతుల మోహన్, బినోద్ కుమార్ సిన్హాలతో కూడిన ట్రిబ్యూనల్.. టీవీ 9 వాటాలు కొనుగోలు చేసిన జూపల్లి జగపతిరావు, ఇతర డైరెక్టర్లను ఇబ్బంది పెట్టేందుకు రవిప్రకాష్ చేసిన చర్యలు అనైతికమని పేర్కొన్నారు. వాటాల విక్రయ ఒప్పందం రవిప్రకాష్ కు కూడా తెలిసే జరిగిందని, అందులో ఆయన కూడా భాగమేనని పేర్కొంటూ.. ప్రతివాదులకు రూ.10 లక్షలు చెల్లించాలని ట్రైబ్యునల్ ఆదేశించింది.