కాబోయేవాడితో పొలానికెళ్లి.. కాలుజారి..

Posted: 11/05/2019 03:48 PM IST

తమిళనాడులో విషాద ఘటన చోటుచేసుకుంది. కాబోయే వాడితో సరదాగా గడిపేందుకు వెళ్లిన యువతి తిరిగిరానీ లోకాలకు తరలివెళ్లింది. జనవరిలో పెళ్లి బాజాలు మోగాల్సిన ఇంట్లో ఇలాంటి విషాదం చోటుచేసుకోవడంతో ఆ కుటుంబం తీవ్ర దిగ్భ్రాంతికి గురైంది. కాబోయేవాడు పక్కనే వుండి కాపాడేందుకు తీసుకున్న చర్యలు విఫలమయ్యాయి. త్వరలో ఒక్కటి కావాల్సిన ఈ జంటను విడదీసింది మాత్రం సెల్ఫీనే. సెల్పీ దిగేందుకు ఓ పాత దిగుడు బావిలోకి దిగిన యువజంట.. సెల్సీ దిగుతూ ప్రమాదవశాత్తు యువతి కాలు జారి బావిలో పడి మృతి చెందింది.

ఈ ఘటన పూర్తి వివరాల్లోకి వెళ్తే.. పట్టాభిరామ్ ప్రాంతంలోని గాంధీనగర్‌కు చెందిన టి మెర్సీ స్టెఫీ, అదే ప్రాంతంలోని నవజీవన్ నగర్‌కు చెందిన డి అప్పూలకు ఇటీవల నిశ్చితార్థం అయ్యింది. జనవరిలో స్టెఫీ, అప్పూ పెళ్లి చేసుకోబోతున్నారు. పెద్దల కుదిర్చిన ఈ వివాహం నేపథ్యంలో ఇద్దరు ఒకర్నోకరు అర్థం చేసుకునేందుకు సరదాగా బైక్ పై బయటకు వెళ్లారు. అలా వెళ్తూన్న క్రమంలో అప్పూను తమ పోలానికి తీసుకువెళ్లాలని భావించింది స్టెఫీ. వందలూరు-మింజూరు రోడ్డులో ఉన్న కండిగై గ్రామంలోవున్న వారి పొలానికి తీసుకెళ్లింది. ఆ పొలం పరిసరాల్లో ఓ పాత బావి ఉంది.
 
బావి పాతది కావడంతో లోపలికి దిగేందుకు మెట్లు కూడా ఉన్నాయి. ఆ బావి వద్ద ఇద్దరూ కలిసి ఫొటోలు దిగారు. సెల్ఫీ తీసుకోవాలన్న ఆలోచన రావడమే ఈ జంట పాలిట శాపంగా మారింది. బావిలోకి దిగి చెరో మెట్టుపై కూర్చుని సెల్ఫీ దిగుతుండగా.. స్టెఫీ బావిలో పడిపోయింది. ఆమెను కాపాడే ప్రయత్నంలో అప్పూ కూడా బావిలో పడిపోయాడు. బావిలో పడగానే... భయంతో అప్పూ సాయం కోసం బిగ్గరగా ఏడుస్తూ కేకలేశాడు. ఆ అరుపులు విన్న పక్కనే పొలం ఉన్న రైతు బావిలో దూకి అప్పూను కాపాడాడు. వెంటనే స్టెఫీని కూడా కాపాడే ప్రయత్నం చేశాడు. కానీ.. దురదృష్టవశాత్తూ అప్పటికే స్టెఫీ చనిపోయింది.