ముఖ్యమంత్రి కన్నా తానేం తక్కువ కాదట.. అందుకనే..

Posted: 09/16/2016 07:30 PM IST

యథా రాజా.. తథా ప్రజ అన్నది నానుడి. కానీ ప్రజలకు అంతటి మహద్భాగ్యాన్ని అందించడం సాధ్యం కాదు. ప్రభుత్వానికి ప్రజలకు మధ్య వారుధులుగా వున్న అధికారగణం దానిని లాగేసుకుంటుంది. దీంతో యధా ముఖ్యమంత్రి.. తథా అధికార యంత్రాగం అన్నట్టుంది మధ్యప్రదేశ్లో పరిస్థితి. ఇటీవల ఆ రాష్ట్రంలో వరద ప్రాంతాలను పరిశీలించేందుకు వెళ్లిన ముఖ్యమంత్రి శివరాజ్ సింగ్ చౌహాన్ మోకాళ్లలోతు నీళ్లలో తడవకుండా ఉండేందుకు భద్రత సిబ్బంది ఇద్దరు చేతులపై ఆయనను ఎత్తుకుని తీసుకెళ్లారు. ఈ ఫొటో మీడియాలో రావడంతో శివరాజ్పై అప్పట్లో విమర్శలు వచ్చాయి.

తాజాగా ఆ రాష్ట్రంలో ప్రభుత్వ ఇంజినీర్ ఒకరు సీఎం మాదిరిగా అదే పనిచేశారు. పన్నా జిల్లాలోని ఓ గ్రామానికి అధికారులు వెళ్లారు. అధికారులు అక్కడి గ్రామస్తులకు మరుగుదొడ్లు నిర్మించుకోవాల్సిందిగా సూచించారు. ఇంతవరకూ బాగానే ఉన్నా.. సబ్ ఇంజనీర్ అరవింద్ త్రిపాఠి చేసిన నిర్వాకం విమర్శలపాలైంది. గ్రామ పర్యటనలో ఆ ఇంజినీర్కు ఓ మురికికాలువ ఎదురైంది. ఆయనకు ఆ కాలువలో దిగి వెళ్లేందుకు ఇబ్బందిగా అనిపించింది.

ఇంకేముంది ఆ గ్రామానికి చెందిన ఓ యువకుడు పాపం ఫ్యాంటును పైకి ముడుచుకుని ఇంజినీర్గారిని వీపుపై ఎక్కించుకుని తీసుకెళ్లాడు. గొప్ప పనిచేశానని భావించాడేమో కానీ ఆ ఇంజినీర్ ఈ ఫొటోను ఫేస్బుక్లో పోస్ట్ చేశాడు. ఇంజినీర్ ఊహించనివిధంగా మీడియాలో వార్తలు రావడం, నెటిజెన్లు, ప్రజల నుంచి తీవ్ర విమర్శలు వచ్చాయి. షూస్, ఫ్యాంటు తడిసిపోతాయని ఇంజినీరే తనకు సాయం చేయాల్సిందిగా ఓ యువకుడి కోరాడని గ్రామస్తులు చెప్పారు.