పీఎఫ్ ఖాతాదారులకు గుడ్ న్యూస్

Posted: 05/31/2016 10:38 AM IST

జూన్ 1 నుంచి పీఎఫ్ (ప్రావిడెంట్ ఫండ్ ) లో కొత్త నిబంధనలు అమలు కానున్నాయి. పీఎఫ్‌ నుంచి ఖాతాదారులు ఎలాంటి పన్ను కోత(టీడీఎస్) లేకుండానే రూ. 50 వేల వరకు విత్ డ్రా చేసుకోవచ్చు. గతంలో టీడీఎస్ లేకుండా 30వేల వరకు విత్ డ్రా చేసుకునే వెసులు బాటు మాత్రమే ఉండేది. ఉద్యోగులు ముందస్థుగా పీఎఫ్‌లోని నగదును విత్‌డ్రా చేయకుండా ఉండేందుకే ఈ కొత్త ప్రతిపాదనలు తీసుకొచ్చింది. తద్వారా రిటైర్మెంట్ సమయంలో ఎక్కువ మొత్తం చేతికి వచ్చేలా ఉండేందుకు పీఎఫ్‌ విత్‌డ్రాలపై సవరణలను ప్రభుత్వం ప్రతిపాదించింది.

అలాగే పీఎఫ్‌లో ఉన్న మొత్తాన్ని ఒక ఖాతా నుంచి మరో ఖాతాకు బదిలీ చేస్తే పన్ను విధించరు. ఉద్యోగులు ఐదేళ్ల తర్వాత పీఎఫ్ విత్‌డ్రా చేసినా పన్ను విధించకూడదని కొత్త చట్టం చెబుతోంది. ఇందుకోసం సభ్యులు 15జి లేదా 15హెచ్‌ ఫారం సమర్పిస్తే ఈ పన్ను ఉండదు. ఈ మొత్తం అందుకున్న తర్వాత కూడా తమ వార్షికాదాయం ఆదాయపన్ను పరిమితి లోపలే ఉంటుందని ఆయా ఫారాల ద్వారా డిక్లరేషన్ ఇవ్వాల్సి ఉంటుంది. వీటిలో 15జి 60 ఏళ్ల లోపువారికి, 15హెచ్ 60 ఏళ్లు దాటినవారికి వర్తిస్తుంది.