ఆ రాతల వెనుక దాగింది నిజమే.. రెండో డైరీ రాసింది కూడా ఆ అమ్మాయే..!

Posted: 09/05/2015 07:07 PM IST

Rishiteshwari case forensic reports state all proofs are original

ఆచార్య నాగార్జున యూనివర్సిటీలో బ్యాచిలర్ ఆఫ్ అర్కిటెక్చర్ మొదటి సంవత్సరం విద్యార్థిని రిషితేశ్వరి ఆత్మహత్య కేసులో అటు ప్రభుత్వం.. ఇటు పోలీసులు అనుమానాలు పటాపంచలు అయ్యాయి. మరీ ముఖ్యంగా చెప్పాలంటే యూనివర్సిటీ ప్రిన్సిపల్ బాబురావు వున్న సందేహాలు నివృత్తి అయ్యాయి. రిషితేశ్వరి ఆత్మహత్య కేసులో దోషులందరికీ శిక్ష పడే వరకు ఏటువంటి పరిస్థితిలో రాజీపడేదే లేదని అమె తండ్రి తేల్చిచెప్పి 24 గంటలు కూడా గడవకముందే.. నిందితులు.. వారి బంధువులు వ్యక్తం చేసిన అనుమానాలను ఫోర్సెనిక్ ల్యాబ్ అధికారులు పటాపంచలు చేశారు.

రిషితేశ్వరి ఆత్మహత్య కేసులో అమె రాసిన డైరీ అంటూ మీడియాకు లభించిన పలు ఆధారాలను పోలీసులు సేకరించి వాటిని అమె రాసిందా లేదా మరెవరైనా ఇలా రాసారా అన్న కోణంలో దర్యాప్తు సాగించిన పోలీసులు ఫోరెన్సిక్ ల్యాబ్ అధికారులు అమె రాసిన డైరీలతో పాటు లేఖలను కూడా అప్పగించారు. కాగా, రెండో డైరీపై ఫోరెన్సిక్ నివేదిక వెల్లడైంది. సూసైడ్ నోట్ తో పాటు, రెండో డైరీలోని చేతిరాత రిషితేశ్వరిదేనని నివేదికలో తేలింది. మొత్తం రెండు డైరీలతో పాటు రిషితేశ్వరికి చెందిన మరో నాలుగు నోట్ బుక్స్ను ఫోరెన్సిక్ అధికారులు పరీక్షించారు. ఒక లాంగ్ నోట్ బుక్, మరొక స్పైరల్ బుక్, మరో రెండు ఆన్సర్ నోట్ బుక్లలోని రిషితేశ్వరి చేతిరాతను ఫోరెన్సిక్ అధికారులు పోల్చి చూశారు. ఈ నివేదికను ఫోరెన్సిక్ అధికారులు శనివారం గుంటూరు జిల్లా ఎస్పీకి అందచేశారు. ఈ కేసులో మరికొందరి పేర్లను చేర్చే అవకాశం ఉంది. ఛార్జ్షీట్ వేసేందుకు పోలీసులు ఏర్పాట్లు చేస్తున్నారు.

జి.మనోహర్