ITEMVIDEOS: కేసీఆర్ కోసం బెంజ్ బస్సు.. బాబుకు ఇందులోనూ పోటీ

Posted: 06/27/2015 01:58 PM IST

ప్రభుత్వాలు వేరైనా పాలసీలు మాత్రం ఒక్కటే. తెలంగాణ, ఏపి సిఎంలు ఒకటే సూత్రాన్ని ఫాలో అవుతున్నారు. అదేంటి కేసీఆర్ కు, చంద్రబాబు నాయుడుకు అస్సలు పడదు కదా మరి అలాంటప్పుడు ఒకరిని మరొకరు ఎలా ఫాలో అవుతున్నారు అని అనుకుంటున్నారా..? అధికారంలోకి వచ్చిన తర్వాత అధికరిక పర్యటనలు చెయ్యడానికి వీలుగా అన్ని హంగులతో బస్సులను రెడీ చేసుకోవడం అందులో పర్యటనలు జరపడం మామూలే. అయితే ఏపి ముఖ్యమంత్రి చంద్రబాబు నాయుడు బిల్డప్ గురించి తెలియని వారు ఎవరూ ఉండరు. ఎంత ఖర్చు చేసైనా సరే హైఫైగా ఉండేందుకు చంద్రబాబు నాయుడు ఎప్పుడూ ముందుంటారు. అయితే తాజాగా చంద్రబాబు నాయుడు బాటలోనే కేసీఆర్ కూడా పయనిస్తున్నారు. అత్యాధనిక హంగులతో కూడిన బస్సును ప్రత్యేకంగా తెలంగాణ సిఎం కేసీఆర్ కోసం తయారుచేయిస్తున్నారు.

తెలంగాణ ముఖ్యమంత్రి కే చంద్రశేఖర్‌రావు పర్యటనల కోసం ప్రభుత్వం మెర్సిడెజ్ బెంజ్ బుల్లెట్‌ప్రూఫ్ వాహనాన్ని కొనుగోలు చేసింది. అత్యాధునిక సాంకేతిక పరిజానంతో కూడిన ఈ బస్సులో పూర్తిస్థాయి భద్రతా ఏర్పాట్లు చేశారు. ముఖ్యమంత్రి ఎటువంటి ఇబ్బందులు లేకుండా ప్రయాణించేందుకు ఇందులో అవసరమైన అన్ని సౌకర్యాలు ఉన్నాయి. సెంట్రల్ ఏసీతోపాటు పడకగది, బాత్‌రూం, అధికారులతో సమావేశమయ్యేందుకు చిన్న హాల్, బస్సుపైకి ఎక్కి ప్రసంగించేందుకు మెట్లు, బస్సుపై ముఖ్యమంత్రితోపాటు ఇతర నాయకులు, అధికారులు, సెక్యూరిటీ సిబ్బంది నిలుచుండేలా ఏర్పాట్లు చేశారు. సుమారు అరకిలోమీటరు దూరం వరకు లేదా లక్షమంది ప్రజలకు స్పష్టంగా వినిపించేలా మెర్సిడెజ్ సంస్థ ప్రత్యేకమైన మైకులను అమర్చింది. అవసరమైతే ఇందులో మీడియా సమావేశాలు కూడా నిర్వహించుకునే వీలుంది. సెన్సర్లతో కూడిన అగ్నిప్రమాద నివారణ పరికరాలు, అత్యాధునిక సాంకేతిక వ్యవస్థతో కూడిన సమాచార వ్యవస్థ, సెక్యూరిటీ అధికారులు ఉండేందుకు క్యాబిన్‌లు, ఎక్కువ సామర్ధ్యం గల బ్యాటరీలు, జనరేటర్ వంటి సదుపాయాలు ఈ బస్సులో ఉన్నాయి. రాష్ట్ర ప్రభుత్వ ఆదేశాల మేరకు చండీగఢ్‌లోని మెర్సిడెజ్ బెంజ్ యూనిట్‌లో ఈ బస్సు తయారైంది. రెండురోజుల క్రితమే ఈ బస్సు తెలంగాణకు బయల్దేరింది. మరో రెండు, మూడురోజుల్లో రాష్ర్టానికి చేరనుంది.

*అభినవచారి*