బిజెపిలో 75 ఏళ్లు దాటితే బ్రెయిన్ డెడ్: యశ్వంత్ సిన్హా

Posted: 06/25/2015 04:35 PM IST

If you are above 75 years bjp considers you brain dead says yashwant sinha

డైబ్భై అయిదేళ్లకు పైబడిన వారినందరినీ 2014 మే 26న బ్రెయిన్‌డెడ్‌గా ప్రకటించారు అంటూ బిజెపి సీనియర్ నాయకుడు యశ్వంత్ సిన్హా మంత్రివర్గంలో చేర్చుకోవడానికి 75 ఏళ్ల వయసును కటాఫ్‌గా పెట్టుకున్న ప్రధాని నరేంద్ర మోదీపై వ్యంగ్యంగా అన్నారు.యశ్వంత్ సిన్హాను మన్మోహన్ సింగ్, నరేంద్ర మోదీ ప్రభుత్వాల మధ్య తేడా ఏమిటని ప్రశ్నించినప్పుడు అటల్‌బిహారీ వాజపేయి, చంద్రశేఖర్ ప్రభుత్వాల్లో ఆర్థిక, విదేశాంగ శాఖలు నిర్వహించిన సిన్హా బిజెపి సీనియర్లను నిర్లక్ష్యం చేయడంపై వ్యంగ్యంగా ఈ వ్యాఖ్యలు చేసారు. అంతేకాదు ముందు మేక్ ఇండియా జరిగితే మిగతావన్నీ వాటంతటవే వస్తాయంటూ నరేంద్ర మోదీ ప్రకటించిన ‘మేక్ ఇన్ ఇండియా’ కార్యక్రమంపై కూడా ఆయన పరోక్షంగా విమర్శలు చేసారు. బ్రెయిన్ డెడ్ అయిన వాళ్లలో నేనూ ఒకడిని అని యశ్వంత్ సిన్హా అన్నారు.

మోదీ మంత్రివర్గంలో స్థానం లభించకపోవడంపై అలకపూనిన అద్వానీ, మురళీ మనోహర్ జోషీ లాంటి సీనియర్ నేతల్లో యశ్వంత్ సిన్హా కూడా ఉన్న విషయం తెలిసిందే. అద్వానీ, జోషీలకు బిజెపి ‘మార్గదర్శక్ మండలి’లో సభ్యులుగా స్థానం కల్పించగా సిన్హాకు మాత్రం ఆ ఆవకాశం కూడా దక్కలేదు. గంగానదిని శుభ్రం చేయడానికి మోదీ ప్రకటించిన ‘నమామి గంగే’ ప్రాజెక్టు ఎప్పటికీ విజయవంతం కాదంటూ జోషీ ఇటీవల ఆ ప్రాజెక్టుపై తీవ్రస్థాయిలో ధ్వజమెత్తడం తెలిసిందే. ‘మేక్ ఇన్ ఇండియా’ కార్యక్రమంపై విమర్శలు చేయడానికి సిన్హా ఆర్థిక మంత్రిగా తాను పని చేసిన రోజులను గుర్తుకు చేసుకుంటూ, రోడ్లు నిర్మించడానికి ఉపయోగించే భారీ పరికరాలపై సుంకాన్ని తాను తగ్గించానని, ఫలితంగా రోడ్ల నిర్మాణం వేయవంతం అయి దేశ ఆర్థిక రంగానికి ఎంతో మేలు జరిగిందని చెప్పారు.

*అభినవచారి*