‘సునందా’ హత్య కేసులో ‘మలుపు’కోసం ‘లై’ పరీక్షలు!

Posted: 05/15/2015 10:14 AM IST

కేంద్ర మాజీ మంత్రి శశి థరూర్ భార్య సునందా పుష్కర్ హత్య కేసు దర్యాప్తు గతేడాది నుంచి కొనసాగుతూ వస్తోంది. అయితే.. పోలీసులు ఎంత విచారణ జరుపుతున్నప్పటికీ ఈ కేసు అంతుచిక్కకుండా వుంటోంది. ఎన్ని విధాలుగా సోదాలు జరిపినప్పటికీ ఈ కేసు కొలిక్కి రావడం లేదు. అందుకే.. ఈ హత్యకేసులో కీలక మలుపు కోసం ఢిల్లీ పోలీసులు మరో ప్రయత్నం దిశగా అడుగులు వేస్తున్నట్లు తెలుస్తోంది.

సునందా హత్య జరిగిన రోజు.. అంతకు ముందు చోటుచేసుకున్న పరిణామాలను శోధిస్తోన్న ఢిల్లీ పోలీసులు.. ప్రధాన సాక్షులుగా వున్న శశిథరూర్ వ్యక్తిగత సహాయకుడు నారాయణ్ సింగ్, డ్రైవర్ భజరంగి, స్నేహితుడు సంజయ్ దావన్లకు లై డిటెక్టర్ (సత్యశోధన) పరీక్షలు నిర్వహించేందుకు సన్నద్ధమవుతున్నారు. ఈ పరీక్షలు నిర్వహించడానికి తమకు అనుమతివ్వాల్సిందిగా పోలీసులు కోర్టుకు విన్నవించారు.

వారు ముగ్గురూ ఈ కేసు దర్యాప్తునకు సహకరించడంలేదని, జవాబులు తెలిసినప్పటికీ కీలకమైన ప్రశ్నలు కొన్నింటికి సమాధానాలు  దాటవేస్తున్నారని పోలీసులు భావిస్తున్నారు. అందుకే ఆ ముగ్గురికి లై డిటెక్టర్ పరీక్షలు నిర్వహించాల్సిఉందని పోలీసులు కోర్టుకు తెలిపారు. సదరు సాక్షులు ముగ్గురు మే 20న కోర్టుకు హాజరుకానున్న నేపథ్యంలో ఆ రోజే వారిని పోలీసు కస్టడీకి అప్పగించే అవకాశాలు ఉన్నట్లు తెలిసింది.