జబర్దస్త్ పై మళ్ళీ కేసు, నాగబాబు, రష్మి పేర్లు

Posted: 01/10/2015 10:18 AM IST

కాంట్రవర్సీగా మారుతున్న కామెడి షో ‘జబర్దస్త్’పై మరో కేసు నమోదయింది. ఈ మద్యే గౌడ సంఘం ప్రతినిధులు ఓ ఎపిసోడ్ లో వేణు చేసిన స్కిట్ పై అభ్యంతరం వ్యక్తం చేసిన విషయం తెలిసిందే. పోలిసు కేసులు, వ్యక్తిగత దాడులు, దూషణలు, ఆర్టిస్ట్ అసోసియేషన్ లో కంప్లయింట్లు అంటూ ఈ రచ్చ ఎలాగోలా ముగిసింది. ఇంతలోనే ప్రోగ్రాంపై మరో కేసు నమోదయింది. ఆ సారి కూడా కరీంనగర్ జిల్లా హుజూరాబాద్ లోనే కేసు నమోదు కావటం గమనార్హం. ఇక తాజా కేసు గురించి చూస్తే.., గతేడాది అక్టోబర్ లో ప్రసారం అయిన ప్రోగ్రాంలో ఓ స్కిట్ బ్రహ్మణ సామాజిక వర్గాన్ని కించపర్చేలా ఉందని తిమ్మాపూర్ కు చెందిన అంజిరెడ్డి అనే న్యాయవాది కోర్టులో పిటిషన్ దాఖలు చేశాడు.

ఈ పిటిషన్ ను విచారించిన కోర్టు.., టీవీ షోలో స్కిట్ చేసిన శేషు,సుధాకర్ తో పాటు, యాంకర్ రష్మీ, జడ్జిలు నాగబాబు, రోజాపై కూడా కేసులు నమోదు చేయాలని పోలిసులను ఆదేశించింది. దీంతో మరోసారి ఈ కామెడి షో వివాదాల చెంతకు చేరుతోందనిపిస్తోంది. ఇప్పటికే వల్గారిటీ ఎక్కువై, కడుపుబ్బా వచ్చే నవ్వుకు బదులు, వెకిలి నవ్వులు వస్తున్నాయని విమర్శలు మూటగట్టుకన్న జబర్దస్త్, ఈ తరహా కేసులతో మరింత దిగజారుతోంది. మరి తాజా వివాదం కాంప్రమైజ్ తో ముగుస్తుందా లేక కోర్టు విచారణ దాకా వెళ్తుందా చూడాలి.