ట్రాయ్ చట్టంలో సవరణ బిల్లు లోక్ సభలో

Posted: 07/11/2014 04:30 PM IST

Nripendra misra as principal secretary to pm narendra modi

టెలిఫోన్ రెగ్యులేటరీ అథారిటీ ఆఫ్ ఇండియా (TRAI) చట్టంలో సవరణ బిల్లును ఈ రోజు లోక్ సభలో ప్రవేశపెట్టటం జరిగింది. దానికి ముందుగా ఆ బిల్లును సమర్థించవలసిందిగా భాజపా సభ్యులందరికి విప్ జారీ చెయ్యటం కూడా జరిగింది. దీనికి లోక్ సభలో నిరసనలు వెల్లువెత్తాయి.

ఈ సవరణ కేవలం ట్రాయ్ ఛైర్మన్ నృపేంద్ర మిశ్రాని ప్రధానమంత్రికి ప్రధాన కార్యదర్శిగా నియమించటం కోసమే జరుగుతుండటంతో లోక్ సభలో ఇతర పార్టీ సభ్యులు నిరసనలు తెలియజేసారు.
నృపేంద్ర మిశ్రా ఉత్తర ప్రదేశ్ నుంచి ఎన్నికైన 1967 బ్యాచ్ ఐఏఎస్ అధికారి. ప్రధానమంత్రి ప్రధాన కార్యదర్శి బాధ్యతలు ఎంతో కీలకమైనవి. ప్రధానమంత్రి కార్యాలయం, క్యాబినెట్ సెక్రటేరియట్, మంత్రుల సెక్రటేరియట్ కి అనుసంధానంగా పనిచేసే గురుతరమైన బాధ్యతను ప్రధానకార్యదర్శి చేపట్టటం జరుగుతుంది.

ప్రస్తుతమున్న చట్టం ప్రకారం ట్రాయ్ లో ఛైర్మన్ లేక సభ్యులుగా వ్యవహరించినవారిని ఆ తర్వాత రెండు సంవత్సరాల వరకు కేంద్ర లేక రాష్ట్ర ప్రభుత్వాలలో పనిచేయటాన్ని నిషేధించటం జరిగింది.
దీని సవరణే ఈ రోజు లోక్ సభలో ప్రవేశపెట్టిన బిల్లు. ఇది పాసయినట్లయితే 69 సంవత్సరాల నృపేంద మిశ్రాని ప్రధానమంత్రికి ప్రధాన కార్యదర్శిగా నియమించటానికి వీలవుతుంది.

ఈ మేరకు ఎన్డియే ప్రభుత్వం ఆర్డినెన్స్ ని జారీ చేసింది. ఉత్తర్ ప్రదేశ్ కేడర్ కి చెందిన నృపేంద్ర మిశ్రా ఐఏఎస్ ప్రధాన మంత్రికి ప్రధాన కార్యదర్శిగా పనిచేస్తారు, ఆయన సర్వీస్ ప్రధానమంత్రి టెర్మ్ తో పాటు గానీ లేదా భవిష్యత్తులో వెలువడే ఆదేశాల మేరకు అంతమొందుతుంది అంటూ పెర్సనల్ మంత్రిత్వ శాఖ నియామకాదేశాన్ని విడుదల చేసింది. దానికి చట్టరూపం ఇవ్వటం కోసం లోక్ సభలో బిల్లుగా ప్రవేశపెట్టటం జరిగింది.

-శ్రీజ