Posted: 02/24/2013 11:44 AM IST

మేము హైదరబాద్ కు వస్తున్నాం అని .. ప్రధాని మంత్రి, కాంగ్రెస్ పార్టీ అధినేత్రి సోనియా గాంధీ రాష్ట్ర ముఖ్యమంత్రి కబురు పంపారు. అయితే దీనిపై  నగరంలో ప్రత్యేక బందోబస్తుతో  కట్టుదిట్టం చేసినట్లు  సమాచారం. దిల్‌సుఖ్‌నగర్‌లో జంట పేలుళ్ళు చోటుచేసుకున్న ప్రాంతాన్ని పరిశీలించి, ఘటనలో గాయపడిన క్షతగాత్రులను పరామర్శించేందుకు ప్రధాని మన్మోహన్‌సింగ్ నగరానికి వస్తున్నారు. ప్రత్యేక విమానంలో ఢిల్లీ నుంచి బయలుదేరి బేగంపేట విమానాశ్రయానికి చేరుకుంటారు. అక్కడి నుంచి హెలికాప్టర్‌లో దిల్‌సుఖ్‌నగర్ సమీపంలోని విక్టోరియా హోంగ్రౌండ్‌కు చేరుకుంటారు. అనంతరం అక్కడి నుంచి రోడ్డుమార్గంలో ఓమ్ని ఆస్పత్రికి వెళ్ళి బాంబు పేలుడు సంఘటనలో గాయపడి చికిత్స పొందుతున్న వారిని పరామర్శిస్తారు. తర్వాత బాంబు పేలుళ్ళు చోటుచేసుకున్న ప్రదేశానికి వచ్చి పరిశీలిస్తారు. అనంతరం మలక్‌పేట యశోదా ఆస్పత్రిలో క్షతగాత్రుల్ని పరామర్శించి విక్టోరియా హోంగ్రౌండ్‌కు చేరుకుంటారు. అక్కడి నుంచి హెలికాప్టర్‌లో బేగంపేట విమానాశ్రయానికి చేరుకుని మధ్యాహ్నం ఒంటి గంట ప్రాంతంలో ప్రత్యేక విమానంలో ఢిల్లీకి బయలుదేరి వెళ్తారు.  ప్రధాని పర్యటించే ప్రాంతాల్ని నేషనల్ సెక్యూరిటీ గార్డ్స్ దళాలు, సైబరాబాద్ పోలీసులు పరిశీలించారు. ప్రత్యేక బందోబస్తు ఏర్పాట్లు చేస్తున్నారు. రాష్ట్ర ప్రభుత్వ ప్రధాన కార్యదర్శి మిన్నీ మాధ్యూ సచివాలయంలో ఉన్నతాధికారులతో సమావేశమై ప్రధాని పర్యటన కార్యక్రమ ఏర్పాట్లను సమీక్షించారు.