Posted: 09/04/2012 10:47 AM IST

యాసిడ్ దాడులు అయ్యాయి! కత్తితో కుత్తుకలు తెగ్గోయడమూ అయిపోయింది! ప్రేమ వైఫల్యం తాలూకూ కసి.. తుపాకీ కాల్పుల స్థాయికి చేరుకుంది!! అది క్షణికావేశం కాదు.. ఒక చోట మూడు హత్యలు చేసి, చేతిలో తుపాకులతో 40 కిలోమీటర్లు ప్రయాణించి మరీ అక్కడ మరో రెండు హత్యలు చేసిన ఘాతుకం! ఆపై ఆత్మహత్య చేసుకునేంతటి ఉన్మాదం! దేశరాజధానికి చెందిన పాతికేళ్ల యువకుడు సాగించిన దారుణ మారణకాండ ఇది. ఢిల్లీకి చెందిన రవి (25) రేణు అనే మహిళతో వివాహేతర సంబంధం కొనసాగిస్తున్నాడు. రేణు భర్త నవీన్.. క్యాబ్ డ్రైవర్‌గా పని చేస్తున్నాడు. అతడు రవికి బంధువే. రెండేళ్లుగా రేణుతో సంబంధం కొనసాగిస్తున్న రవి కన్ను.. ఇటీవలే ఆమె చెల్లెలు బేబీపై పడింది. ఆమెను తనకిచ్చి పెళ్లి చేయమని రేణును కోరగా ఆమె అందుకు నిరాకరించింది. కోపంతో రగిలిపోయిన రవి.. పొద్దున తొమ్మిదిగంటలకు ఢిల్లీలోని బిందాపూర్‌లో ఉన్న రేణు ఇంటికి వెళ్లి ఆమెను, ఆమె భర్త నవీన్‌ను కాల్చి చంపేశాడు. తుపాకీ శబ్దాలు విని పరిగెత్తుకుంటూ వారి పోర్షన్‌లోకి వచ్చిన ఇంటి యజమానురాలు షీలా (53)నూ వదిలిపెట్టలేదు.ఆమె తలలోకి మూడుసార్లు కాల్చాడు. తిన్నగా.. అక్కడికి 40 కిలోమీటర్ల దూరంలో ఉన్న భోజాపూర్ (ఉత్తరప్రదేశ్)కు చేరుకున్నాడు. అక్కడ రేణు తండ్రి హరేందర్, సోదరి బేబీ ఉంటున్న ఇంటికి చేరుకుని వాళ్లిద్దరినీ కాల్చేశాడు. పై అంతస్తుకు వెళ్లి తనను తాను కాల్చుకుని చనిపోయాడు. రేణు, షీలా హత్యలు జరిగిన సమయంలో పనిమనిషి ఆ ఇంట్లోనే ఉన్నదని పోలీసులు తెలిపారు. అయితే, ఆమె భయంతో ఎలాంటి వివరాలూ చెప్పలేకపోతోందన్నారు. కాగా.. తొ లుత, రేణు భర్త ఇంట్లో లేడని పోలీసులు భావించారు. కానీ.. సాయంత్రానికి అతని మృతదేహం ఇంట్లోనే పడగ్గదిలో మంచం కింద లభ్యమైందని చెప్పారు.