Posted: 05/23/2012 05:16 PM IST

టీనేజ్‌లో ఉన్న పిల్లలు అస్తమానూ ఫోన్లో మాట్లాడుతుంటారు. 'ఎవరితో' అని ప్రశ్నిస్తే 'ఫ్రెండ్‌తో' అని చెప్పి ఊరుకుంటారు. వాళ్లు ఎవరితో మాట్లాడుతున్నారో అని తల్లిదండ్రులకు బెంగ. బ్రిటన్‌కు చెందిన బెమిలో అనే సెల్‌ఫోన్ కంపెనీ ఈ బెంగలన్నింటినీ తీర్చేసే సర్వీస్ అందిస్తానంటోంది. 8-16 ఏళ్ల మధ్య పిల్లలకు ఈ సర్వీసులను ఆ సంస్థ ఆఫర్ చేస్తోంది. ఈ సర్వీస్ ఉన్న ఫోన్లను పిల్లలకు ఇస్తే.. ఫోన్ వినియోగంపై తల్లిదండ్రుల నియంత్రణ ఉంటుంది.

వారు ఎవరితో మాట్లాడొచ్చు, ఎవరికి మెసేజ్‌లు పంపొచ్చు వంటి విషయాలను కంట్రోల్ చేయవచ్చు. అవసరమనుకుంటే పిల్లల ఫోన్లను స్విచాఫ్ చేసే అవకాశం కూడా తల్లిదండ్రులకు ఉంటుంది. ఈ సర్వీసు కావాలనుకున్న వారు బెమిలో వెబ్‌సైట్‌లోకి వెళ్లి ఆప్షన్లను సెట్ చేయడం ద్వారా పిల్లల ఫోన్లను నియంత్రించే వీలుంటుంది.

పిల్లలు కొత్తగా ఏదైనా నెంబర్‌ను తమ కాంటాక్ట్ లిస్టులో చేర్చుకోవాలన్నా.. తల్లిదండ్రులు సైట్‌లో అనుమతించాల్సిందే. ఆ ఫోన్‌కి వచ్చే, ఆ ఫోన్ నుంచి వెళ్లే సూక్ష్మసందేశాలన్నింటినీ పేరెంట్స్ వెబ్‌సైట్‌లో చూడొచ్చు. తమ ఫోన్‌కి వచ్చిన ఎస్సెమ్మెస్‌లను పిల్లలు డిలీట్ చేసినా సరే.. అవి వెబ్‌సైట్‌లో కనిపిస్తాయి. టైమర్ ద్వారా నిర్ణీత వేళలను సెట్‌చేస్తే, ఆ సమయంలో ఎంత ప్రయత్నించినా ఫోన్ ఆన్‌కాదు. మన దేశంలో ఇలాంటి సర్వీసులు ఎప్పుడు అందుబాటులోకి వస్తాయో!