చావనైనా చస్తాం... మేము వదులుకోం ?

Posted: 04/30/2013 06:43 PM IST

 అటవీ అధికారులకు, కొల్లేరు పరిసర ప్రాంత గ్రామ ప్రజలకు మధ్య అంతరాన్ని పెంచుతున్నాయి. ఆటపాక వలస పక్షులు సంరక్షణ కేంద్రం మాదిరిగా గోనెపాడులో మరో కేంద్రాన్ని ఏర్పాటు చేయడానికి అటవీ అధికారులు ప్రయత్నించారు. ఇటీవల ఆ పనులను ఆటపాక, గోనెపాడు గ్రామస్తులు అడ్డుకున్న విషయం విదితమే. నత్తగుళ్ళపాడులో కొల్లేరు భూమిని సర్వే చేయడానికిఅటవీశాఖ రేంజర్ రత్నకుమార్, డెప్యూటి రేంజర్ ప్రసాద్ సిబ్బందితో వెళ్లారు. గ్రామస్తులు కొల్లేరు సమీపంలోని నాగేంద్రుని గుడి వద్ద సమావేశమయ్యారు. అక్కడకు వచ్చిన అటవీ అధికారులను పక్షుల కేంద్రం ఏర్పాటు పనులను విరమించుకోవాలని కోరారు. ఈ విషయంపై మీ అభిప్రాయాలను తెలుసుకోడానికి వచ్చామని చెప్పినప్పటికీ గ్రామస్తులు అధికారులతో వాగ్వివాదానికి దిగారు. ప్రభుత్వమే మాకు సొసైటీలను ఏర్పరచి చేపల సాగుకు అవకాశం ఇచ్చిందని, కొల్లేరు ఆపరేషన్ సమయంలో వాటిని రద్దు చేశారని చెప్పారు. జీవనోపాధిని కోల్పోయామన్నారు. పశువులు తాగడానికి సైతం నీరు లేదని వాపోయారు. ఇటువంటి సమయంలో సొసైటీ భూముల స్థానంలో పక్షుల కేంద్రం ఏర్పాటు తగదన్నారు. చావనైనా చస్తాం కానీ... కొల్లేరు భూములను వదులుకోం అంటూ ఆవేశంగా మాట్లాడారు. కొల్లేరు ఆపరేషన్ సమయంలో అదనంగా ధ్వంసం చేసిన 7500 ఎకరాలను పంపిణీ చేయాలని ప్రభుత్వాన్ని కొల్లేరు సంఘం తరఫున కోరామని... ఆ నిర్ణయం వచ్చేవరకు వేచి ఉండాలని అధికారులను కోరారు. రెవెన్యూ లెక్కల ప్రకారం ఈ గ్రామంలో 400 ఎకరాలు ఉందని, వాటిలో కొన్ని ఎకరాలు మినహాయించే అవకాశం ఉందని అధికారులు చెప్పినప్పటికీ గ్రామస్తులు సమ్మతించలేదు. దీంతో అధికారులు వెనుతిరిగారు.