మహిళలు అందంగా కనిపించాలంటే.. జుట్టు అలంకరణ కూడా అంతే బాగుండాలి. జుట్టు ఎంత పొడవుగా, మందంగా వుంటే.. మహిళలు కూడా అంతే అందంగా, ఆకర్షణీయంగా కనిపిస్తారు. 

ప్రస్తుతకాలంలో మహిళలు తమకు ఇష్టమైనవిధంగా రకరకాల హెయిర్ స్టయిల్స్ ను ప్రయోగిస్తున్నారు. కొందరు కర్లీ హెయిర్స్ పెట్టుకోవడానికి ఇష్టపడితే మరికొంతమంది జుట్టును పొట్టిగా వుంచుకోవడానికి ఇష్టపడతారు. అదేవిధంగా మరికొంతమంది స్ట్రెయిట్ హెయిర్స్ మెయింటెన్ చేయడంలో ఇష్టపడతారు. 

కానీ చాలామంది మహిళలు పొడిజుట్టు (డ్రై హెయిర్) తో బాధపడుతుంటారు. తమ జుట్టును స్మూత్ గా, సిల్కీగా, హెల్తీగా మెయింట్ చేయడానికి నానాతంటాలు పడుతుంటారు. చాలా ఎక్కువ ఖర్చుతో కూడుకున్న స్పాలకు, రకరకాల తైలాలు, అనేక పద్ధతులను అనుసరిస్తూ వుంటారు. 

ఇటువంటి సమస్యలు ముఖ్యంగా వేడివాతావరణం వల్ల సంభవిస్తుంది. దాంతోపాటు వాతావరణ కాలుష్యం, ఆహారపు అలవాట్లు, నేచురల్ ఆయిల్స్ లో మార్పులు వుండటం వల్ల జుట్టు పొడిగా, చిట్లినట్లుగా కనిపిస్తుంది. 

అంతేకాదు.. దీనివల్ల వారి జుట్టు చాలా త్వరగా తెల్లబడటం మొదలవుతుంది. ఫలితంగా జుట్టు రాలే సమస్య కూడా ఎదుర్కోవాల్సి వుంటుంది. 

అయితే ఎక్కువ ఖర్చు లేకుండా, బయటకు హెయిర్ సెలూన్ లకు వెళ్లకుండా మీరు మీ ఇంట్లోనే కొన్ని పద్ధతులను అనుసరిస్తే.. ఈ సమస్య నుంచి అధిగమించే అవకాశం వుంటుంది. 

డ్రై హెయిర్ ను నివారించుకునే చిట్కాలు :

శెనగపిండి ప్యాక్ : డ్రై హెయిర్ ను నివారించుకోవడానికి ఇది ఎంతో ఉపయోగకరమైన విధానం. దీనిని తయారుచేయడానికి... ఒక కప్పులో పచ్చిపాలు లేదా కొబ్బరి పాలను తీసుకోవాలి. అందులో 3 చెంచాలా శెనగపిండి వేసి ఒక పేస్ట్ ను తయారుచేసుకోవాలి. ఈ మిశ్రమాన్ని తలకు పెట్టుకొని 15 నిముషాల వరకు ఉంచుకోవాలి. తరువాత ఏదైనా ఒక మంచి షాంపుతో తలస్నానం చేసుకోవాలి. ఇది ఎంతో మంచి ఫలితాన్ని కూడా ఇస్తుంది. దీనిని ప్రతిరోజూ అనుసరించుకుంటే చాలా మంచిది. 

నూనెతో మసాజ్ : తమ జుట్టును అందంగా వుంచుకోవడానికి మహిళలు పూర్వం నుంచే కొన్ని నూనెలను కేటాయించుకునేవారు. అవి జుట్టు పెరుగుదలను ప్రొత్సహించడమే కాకుండా... తలకు బ్లడ్ సర్క్యులేషన్ పెంచడంలో ప్రధాన పాత్రను పోషిస్తాయి. ముఖ్యంగా బాదం, కొబ్బరి నూనెలను సమానంగా తీసుకుని మిక్స్ చేసుకోవాలి. అందులో ఆముదం వేసుకుని బాగా మిక్స్ చేసుకోవాలి. ఈ మిశ్రమంలో గోరువెచ్చగా చేసుకున్న ల్యావెండర్ ఆయిల్ ను కలిపి తలకు మసాజ్ చేసుకోవాలి. అరగంట తరువాత ఏదైనా మంచి షాంపుతో తలస్నానం చేసుకుంటే మంచి ఫలితాన్నిస్తుంది. 

తేనె : ఇది పొడిబారిన జుట్టును నివారించడానికి అద్భుతమైన మాయిశ్చరైజర్ గా పనిచేస్తుంది. మొదటగా రెండుకప్పులు గోరెవెచ్చని నీళ్లు తీసుకుని.. అందులో ఒక చెంచా తేనెను మిక్స్ చేసుకోవాలి. ఈ మిశ్రమాన్ని తలకు మసాజ్ చేసుకోవాలి. 

ఎగ్ ప్యాక్ : గుడ్డులో చాలా వరకు అధికంగా ప్రొటీనులు, విటిమన్లు వుంటాయి. ఇందులో వుండే తెల్లపదార్థం జుట్టుకు నేచురల్ మాయిశ్చరైజ్ గా పనిచేయడమే కాకుండా... ఎంజైమ్స్ ను తినే బ్యాక్టీరియాలను కలిగి వుంటుంది. ఫలితంగా జుట్టు పొడిబారకుండా, రాలకుండా కాపాడుతుంది. ఒక గుడ్డు సొనకు తేనె, పెరుగు మిక్స్ చేసి ఒక మిశ్రమాన్ని తయారుచేసుకోవాలి. ఈ మిశ్రమాన్ని జుట్టు మొత్తం అప్లై చేసుకుని, అరగంట తరువాత వేడినీటితో స్నానం చేసుకోవాలి. 

బీర్ : బీర్ లో కండీషన్ లక్షణాలు పుష్కలంగా వుంటాయి కాబట్టి ఇది డ్రై హెయిర్ కు, డల్ హెయిర్ కు మంచి షైన్ అందించడంలో ముఖ్యపాత్రను పోషిస్తుంది. ఇందులో వుండే బి కంటెంట్.. హెయిర్ ను సాఫ్ట్ గా వుంచడంలో సహాయపడుతుంది. అరకప్పు బీర్ ను, రెండు కప్పులు నీళ్లను తీసుకుని మిక్స్ చేసి పక్కన పెట్టుకోవాలి. మీకు నచ్చిన ఒక మంచి షాంపుతో స్నానం చేసిన తరువాత ఈ బీర్ మిశ్రమాన్ని తలకు పట్టించుకోవాలి. తిరిగి స్నానం చేయకుండా.. అలాగే తలమీద తడిని వుంచుకోవాలి. 

బేకింగ్ సోడా : ఇది తలలో వుండే మలినాలను, వాటి ఉత్పత్తులను తొలగించడంలో సహాయపడుతుంది. అంతేకాదు.. ఇది జుట్టును నల్లగా మార్చడమే కాకుండా... తలనుంచి విడుదలయ్యే నూనెను గ్రహించుకుంటుంది. అరకప్పు నీటిలో ఒక టీ స్పూన్ బేకింగ్ సోడా వేసి మిక్స్ చేసుకోవాలి. మీరు తలస్నానం చేసేముందు షాంపుతో పాటు ఈ మిక్స్ ను కూడా తలకు రాసుకోవచ్చు. 

అవొకాడో, కొకొనట్ ప్యాక్ : అవొకాడో నూనెలో ప్రొటీన్, విటమిన్లు అధిక మోతాదులో వుంటాయి. ఇది తలచర్మంలో వుండే నూనెను గ్రహించడంతోపాటు జుట్టును పొడిగా మారకుండా సహాయపడుతుంది. ఒక అవొకాడోను మొదటగా మెత్తగా చేసి, అందులో అరకప్పు కొకొనట్ పాలను మిక్స్ చేసుకోవాలి. ఈ మిశ్రమాన్ని తలకు పట్టించి బాగా మసాజ్ చేసుకోవాలి. 15 నిముషాల తర్వాత చల్లని నీళ్లతో స్నానం చేసుకోవాలి. 

ఇలా ఈ విధంగా మీరు మీ జుట్టును ఎంతో స్మూత్ గా, రాలకుండా జాగ్రత్తలు తీసుకోవచ్చు.