ముఖ్యమంత్రుల మండలిని స్వాగతించిన కేసీఆర్

Posted: 12/07/2014 10:15 PM IST

ప్రణాళిక సంఘానికి కాలం చెల్లిందని, ప్రతిపాదిత ముఖ్యమంత్రుల మండలి ఏర్పాటుపై ప్రధాన మంత్రి నరేంద్రమోడీ నిర్ణయాన్ని స్వాగతిస్తున్నట్లు తెలంగాణ ముఖ్యమంత్రి కె.చంద్రశేఖరరావు తెలిపారు. ప్రధాని మోదీ తీసుకున్న నిర్ణయాల పట్ల కేసీఆర్ హర్షం వ్యక్తం చేశారు. ప్రధానితో రాష్ట్రాల ముఖ్యమంత్రుల సమావేశం అనంతరం ఆయన మాట్లాడారు. ముఖ్యమంత్రుల మండలికి నిధులు, అధికారాలు ఇవ్వాలని, శాఖల వారీగా రాష్ట్రాలకు కేంద్రం నిధులు కేటాయించాలని కోరారు. పంచవర్ష ప్రణాళిక స్థానంలో దీర్ఘకాల వార్షిక ప్రణాళిక ప్రవేశపెట్టాలన్నారు.

ప్రణాళిక సంఘం స్థానే ఏర్పాటు చేయాలని భావిస్తున్న ముఖ్యమంత్రుల మండలి సమర్థవంతంగా పనిచేసేందుకు ప్రత్యేక సెక్రటేరియట్ ఏర్పాటు చేయాలని సూచించారు. సారుప్యత ఉన్న సమస్యలపై ఆయా రాష్ట్రాల ముఖ్యమంత్రులతో ఉప సంఘాలు ఏర్పాటు చేయాలన్నారు. పంచవర్ష ప్రణాళికల స్థానంలో పది పదిహేనేళ్ల ప్రణాళికలు రూపొందించాలన్నారు. తెలంగాణలో అమలు చేస్తున్న మన ఊరు మన ప్రణాళికను ప్రధాని మోదీకి వివరించినట్టు కేసీఆర్ తెలిపారు.

జి.మనోహర్