Posted: 03/09/2012 01:41 PM IST

మన రాష్ట్రంలో ఉప ఎన్నికలతో పాటు రాజ్య సభ ఎన్నికల వేడి రాజుకుంది. ఈ నెలాఖరులోగా రాజ్యసభకు కొత్త అభ్యర్థులను ఎన్నుకునేందుకు ఎన్నికల కమీషన్ షెడ్యూలు ప్రకటించిన విషయం తెలిసిందే. అయితే కాంగ్రెస్ పార్టీ నుండి రాజ్యసభకు ఎవరిని ఎంపిక చేయాలనే దాని పై మల్లగుల్లాలు పడుతోంది. పీఆర్పీని కాంగ్రెస్ లో విలీనం చేసినందుకు చిరంజీవికి రాజ్యసభ సీటు ఇవ్వాలని ఎప్పటి నుండో అధిష్టానం భావిస్తున్న విషయం తెలిసిందే. రాజ్యసభకు చిరంజీవితో పాటు కాంగ్రెస్ ఫైర్ బ్రాండ్ రేణుకా చౌదరికి రాజ్యసభ సీట్లు ఖరారయినట్లు తెలుస్తుంది. త్వరలో పదవీ విరమణ చేస్తున్న దాసరి నారాయణరావు, రషీద్ అల్వీ, కె.కేశవరావు, సంజీవరెడ్డిలకు ఈసారి రాజ్యసభ సీటు నిరాకరిస్తారని పార్టీ వర్గాలు భావిస్తున్నాయి. మార్చి 12 తర్వాతే ఈ విషయంపై అధికారికంగా చర్చలు జరుగుతాయని తెలుస్తుంది.

వీరిద్దరికే కాకుండా రెడ్డి సామాజిక వర్గానికి చెందిన వారికి కూడా ఓ సీటు దక్కవచ్చనే సమాచారం కూడా ఉంది. మాజీ స్పీకర్ సురేశ్‌రెడ్డి, ముఖ్యమంత్రికి న్యాయసలహాదారుగా ఉన్న వరంగల్ మాజీ ఎంపీ సురేందర్‌రెడ్డి కుమారుడు రఘు రెడ్డి, పెన్నా ప్రతాప్‌రెడ్డిలతో పాటు వైఎస్ సోదరుడు వైఎస్ వివేకానంద రెడ్డి కూడా రంగంలో ఉన్నారు. సోనియాను ఇప్పటికే కలుసుకున్న వివేకానంద రెడ్డి మూడు రోజులుగా ఢిల్లీలోనే మకాం వేసి ఆజాద్‌ను, ఇతర నేతలను కలుసుకున్నారు.